जळगाव मिरर | २९ जानेवारी २०२६
शहरातील तालुका पोलीस ठाण्याच्या हद्दीत गेल्या चार ते पाच दिवसांपासून चोरट्यांनी बंद घरांना लक्ष्य केल्याचे उघडकीस आले आहे. निमखेडी शिवारातील संत सावता नगर, चिताहरण मंदिराजवळील बंद घराचा कडीकोयंडा तोडून चोरट्यांनी सोने-चांदीचे दागिने असा सुमारे ६० हजार रुपयांचा ऐवज चोरून नेल्याची घटना समोर आली आहे.
मिळालेल्या माहितीनुसार, विकास लक्ष्मण पाटील (वय ३६, रा. संत सावता नगर, चिताहरण मंदिर, निमखेडी शिवार) यांचे घर दि. २५ जानेवारी रोजी मध्यरात्रीच्या सुमारास बंद होते. ही संधी साधून अज्ञात चोरट्यांनी घराच्या मुख्य दरवाजाचा कडीकोयंडा तोडून आत प्रवेश केला. घरातून सुमारे ४० हजार रुपये किंमतीचे पाच ग्रॅम वजनाचे सोन्याचे दोन टोंगल, अंगठी, मणी तसेच २० हजार रुपये किंमतीचे दोन भारचे चांदीचे ग्लास, नऊ भारच्या चांदीच्या साखळ्या व पाच भारांचे जोडवे असा एकूण ६० हजार रुपयांचा ऐवज चोरून नेण्यात आला.
दि. २६ जानेवारी रोजी ही घटना उघडकीस आल्यानंतर विकास पाटील यांनी तालुका पोलीस ठाण्यात तक्रार दिली. त्यानुसार अज्ञात चोरट्यांविरुद्ध गुन्हा दाखल करण्यात आला असून, पुढील तपास पोलीस नाईक विजय निकम करीत आहेत.
दरम्यान, गेल्या आठवडाभरात तालुका पोलीस ठाण्याच्या हद्दीत बंद घरांमध्ये चोरीच्या घटना वाढल्याने नागरिकांमध्ये भीतीचे वातावरण निर्माण झाले आहे. चोरटे दिवसा बंद घरांची रेकी करून रात्री चोरी करीत असल्याचे पोलिस तपासात निष्पन्न झाले आहे. त्यामुळे वाढीव लोकवस्तीच्या भागात पोलिसांनी गस्त वाढवावी, अशी मागणी नागरिकांकडून होत आहे.
