जळगाव मिरर | ३१ जानेवारी २०२६
जिल्ह्यात वाढत्या वाहनचोरीच्या घटनांना आळा घालण्यासाठी स्थानिक गुन्हे शाखेने धडक कारवाई करत जामनेर व भुसावळ परिसरातील मोटारसायकल चोरीचे गुन्हे उघडकीस आणले आहेत. या कारवाईत तीन चोरीच्या मोटारसायकली जप्त करण्यात आल्या असून दोन तरुणांना ताब्यात घेण्यात आले आहे.
मिळालेल्या माहितीनुसार, पोलिसांनी गोपनीय माहितीच्या आधारे जामनेर येथून अनुराग लक्ष्मण सूनगत (वय १९) आणि दर्शन बाप्पू चव्हाण (वय १८) यांना ताब्यात घेतले. चौकशीदरम्यान त्यांनी त्यांच्या एका साथीदारासह विविध ठिकाणांहून मोटारसायकली चोरी केल्याची कबुली दिली.
तपासादरम्यान जामनेर पोलीस ठाण्यात दाखल गुन्ह्यांतील दोन मोटारसायकली तसेच भुसावळ पोलीस ठाण्यात दाखल गुन्ह्यातील एक मोटारसायकल असा एकूण तीन मोटारसायकलींचा मुद्देमाल पोलिसांनी जप्त केला आहे. हा मुद्देमाल पुढील कायदेशीर कारवाईसाठी संबंधित पोलीस ठाण्यांच्या ताब्यात देण्यात आला आहे.
ही यशस्वी कारवाई पोलीस अधीक्षक डॉ. महेश्वर रेड्डी व अपर पोलीस अधीक्षक अशोक नखाते यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड, पोलीस उपनिरीक्षक शरद बागल, ग्रेड पोलीस उपनिरीक्षक रवी नरवाडे तसेच पथकातील इतर अधिकाऱ्यांनी संयुक्तपणे पार पाडली.
