जळगाव मिरर | १ फेब्रुवारी २०२६
वाहतूक सुरक्षा सप्ताहानिमित्त जिल्हा पोलीस दलातर्फे शहरातून हेल्मेट मोटारसायकल रॅली काढण्यात आली. या रॅलीत पोलीस अधिकारी व अंमलदारांनी हेल्मेट परिधान करून उत्स्फूर्त सहभाग घेत नागरिकांमध्ये वाहतूक सुरक्षेबाबत जनजागृती केली.
शहरातील पोलीस मुख्यालयातून या रॅलीला पोलीस अधीक्षक डॉ. महेश्वर रेड्डी यांनी हिरवी झेंडी दाखवून सुरुवात केली. यावेळी अपर पोलीस अधीक्षक अशोक नखाते, उपविभागीय पोलीस अधिकारी (गृह विभाग) आव्हाड यांच्यासह विविध शाखांचे अधिकारी उपस्थित होते.
या रॅलीमध्ये उपविभागीय पोलीस अधिकारी नितीन गणापुरे, शनिपेठ पोलीस निरीक्षक कावेरी कमलाकर, शहर वाहतूक शाखेचे पोलीस निरीक्षक पवनकुमार देसले यांच्यासह मोठ्या संख्येने पोलीस अधिकारी व अंमलदार सहभागी झाले होते. ही हेल्मेट रॅली पोलीस अधीक्षक कार्यालयातून निघून स्वातंत्र्य चौक, आकाशवाणी चौक, काव्यरत्नावली चौक, महाबळ, छत्रपती संभाजी महाराज चौक या मार्गाने शहरात फिरून पुन्हा पोलीस अधीक्षक कार्यालयात समारोप झाली.
वाढते रस्ते अपघात रोखण्यासाठी तसेच स्वतःच्या जीवाच्या सुरक्षेसाठी हेल्मेटचे महत्त्व नागरिकांना पटवून देण्याचा उद्देश या रॅलीमागे असल्याचे यावेळी सांगण्यात आले.
