जळगाव मिरर | २ फेब्रुवारी २०२६
राज्यात रस्ते अपघातांची मालिका थांबण्याचे नाव घेत नसून, नागपूरजवळील समृद्धी महामार्गावरील अपघातानंतर आता बुलढाणा जिल्ह्यातील लोणारजवळ आणखी एक भीषण अपघात घडला आहे. लोणार ते किनगाव जट्टू मार्गावर भरधाव कारने समोरून येणाऱ्या रिक्षाला जोरदार धडक दिल्याने दोन मजूर महिलांचा जागीच मृत्यू झाला, तर सात महिला गंभीर जखमी झाल्या आहेत.
धडकेचा जोर इतका तीव्र होता की रिक्षाचा अक्षरशः चुराडा झाला. अपघातानंतर रिक्षातील काही महिला दूरवर फेकल्या गेल्याने अनेकांना गंभीर दुखापत झाली. जखमींपैकी तीन महिलांची प्रकृती चिंताजनक असल्याची माहिती असून, त्यांच्यावर तातडीने उपचार सुरू आहेत.
घटनेची माहिती मिळताच स्थानिक नागरिकांनी तत्काळ घटनास्थळी धाव घेत मदतकार्य सुरू केले. त्यानंतर पोलिसांना पाचारण करण्यात आले. जखमी महिलांना तात्काळ लोणार आणि मेहकर येथील शासकीय रुग्णालयात दाखल करण्यात आले असून, त्यांच्यावर उपचार सुरू आहेत.
अपघाताची माहिती मिळताच जखमींच्या नातेवाईकांनीही रुग्णालयात धाव घेतली. घटनास्थळी काही काळ तणावाचे वातावरण निर्माण झाले होते. दरम्यान, या अपघाताचा पुढील तपास पोलीस करत असून, संबंधित कारचालकाची चौकशी सुरू असल्याची माहिती पोलिसांनी दिली आहे.
