जळगाव मिरर | ३ फेब्रुवारी २०२६
आदित्य धर दिग्दर्शित आणि बॉक्स ऑफिसवर प्रचंड यश मिळवलेल्या ‘धुरंधर’ चित्रपटाचा बहुप्रतीक्षित दुसरा भाग ‘धुरंधर २’ अखेर प्रेक्षकांच्या भेटीला येणार असून, त्याचा स्फोटक टीझर नुकताच प्रदर्शित झाला आहे. ५ डिसेंबर २०२५ रोजी प्रदर्शित झालेल्या धुरंधर चित्रपटाने प्रेक्षकांचा आणि समीक्षकांचा भरघोस प्रतिसाद मिळवत अनेक कमाईचे विक्रम मोडले होते.
पहिल्या भागात रणवीर सिंग, अक्षय खन्ना, अर्जुन रामपाल, आर. माधवन आणि संजय दत्त यांच्या प्रभावी भूमिका पाहायला मिळाल्या होत्या. विशेषतः अक्षय खन्नाच्या भूमिकेचे मोठ्या प्रमाणात कौतुक झाले होते. मात्र रणवीर सिंगचे पात्र तुलनेने कमी दाखवण्यात आल्याची चर्चा होती. आता धुरंधर २ मध्ये रणवीर सिंह संपूर्ण कथानकाचा केंद्रबिंदू असणार असल्याचे टीझरवरून स्पष्ट होते.
कालच रणवीर सिंहने धुरंधर २ मधील स्वतःचा खतरनाक लूक असलेले पोस्टर सोशल मीडियावर शेअर केले होते. रक्ताने माखलेला चेहरा, काळा कोट आणि संतप्त नजरेतून कॅमेऱ्याकडे पाहणारा रणवीर या पोस्टरमध्ये दिसतो. पोस्टरसोबत “आता गोष्टी गोंधळात टाकण्याची वेळ आली आहे,” असे कॅप्शन देत त्याने चाहत्यांची उत्सुकता आणखी वाढवली होती.
‘धुरंधर २: द रिव्हेंज’ असे नाव असलेला हा चित्रपट १९ मार्च २०२६ रोजी चित्रपटगृहात प्रदर्शित होणार आहे. नुकताच प्रदर्शित झालेल्या टीझरमध्ये रणवीर सिंह पुन्हा एकदा धुरंधरच्या अवतारात धडाकेबाज अॅक्शन करताना दिसतो. या भागात त्याच्या पूर्वायुष्यात घडलेल्या घटनांवर प्रकाश टाकण्यात येणार असून, सूड, संघर्ष आणि सत्तासंघर्ष यांची झलक टीझरमध्ये पाहायला मिळते.
टीझर पाहिल्यानंतर रणवीर सिंहने या भूमिकेसाठी घेतलेली मेहनत आणि त्याची शारीरिक-मानसिक तयारी प्रकर्षाने जाणवते. मंगळवारी सकाळीच दिग्दर्शक आदित्य धर यांनी सोशल मीडियावर पोस्ट शेअर करत धुरंधर २ चा टीझर प्रदर्शित होणार असल्याची घोषणा केली होती. पहिल्या भागाच्या प्रचंड यशानंतर धुरंधर २ कडूनही प्रेक्षकांच्या मोठ्या अपेक्षा असून, हा चित्रपट पुन्हा एकदा बॉक्स ऑफिसवर धुमाकूळ घालणार, अशी चर्चा सध्या जोरात सुरू आहे.
