जळगाव मिरर | १४ फेब्रुवारी २०२६
आव्हाणे शिवारातील डम्पिंग ग्राऊंडवर महापालिकेकडून घनकचरा व्यवस्थापन प्रकल्प मंजूर करण्यात आला आहे. या प्रकल्पाच्या कामाचे कार्यादेश दिले गेले आहेत मात्र, प्रत्यक्षात कामाला सुरुवात झालेली नव्हती, सदर प्रकल्पाचे काम आठ दिवसात सुरू करण्याच्या सूचना उपमहापौर मनोज चौधरी यांनी अधिकाऱ्यांसह मक्तेदाराला दिल्या.
उपमहापौर मनोज चौधरी यांच्यासह प्रभाग क्रमांक ९ मधील नगरसेवकांनी शुक्रवारी पुन्हा मनपाच्या डम्पिंग ग्राऊडवर जाऊ पाहणी केली. यावेळी मनपा अधिकारी कर्मचारी व प्रकल्पाच्या कामाचे मक्तेदार उपस्थित होते. शहरातील कचऱ्याची विल्हेवाट लावण्यासाठी घनकचरा प्रकल्पाचे कामाचा मक्ता श्री. श्री. इन्फ्रास्ट्रक्चर यांना देण्यात आला होता. मात्र त्याठिकाणी पडून असलेल्या कचऱ्यामुळे काम होत नसल्याचा दावा मक्तेदाराने केला होता. परिणामी परिसरातील नागरिकांचे आरोग्य धोक्यात आले होते. ज्याठिकाणी प्रकल्पाचे काम केले जाणार आहे, त्याठिकाणी मोठ्या प्रमाणावर कचरा होता.जवळपास ५० टक्के कचरा त्याठिकाणाहून उचलण्यात आला आहे.
तसेच मक्तेदार श्री श्री इन्फ्रास्ट्रक्चर यांना आठ दिवसात प्रकल्पाचे काम सुरू करण्याचे आदेश देण्यात आले असल्याचे उपमहापौर मनोज चौधरी यानी सांगितले. उपमहापौर मनोज चौधरी यांनी प्रकल्पाच्या कामात येणाऱ्या अडचणींसंदर्भात आरोग्याधिकारी उदय पाटील, शहर अभियंता योगेश बोरोले यांना आवश्यक त्या सूचना केल्या आहेत. तसेच येत्या चार महिन्यात या प्रकल्पाचे काम पूर्ण करण्याचे सूचना मक्तेदाराला करण्यात आल्याचेही उपमहापौर मनोज चौधरी यांनी सांगितले.
