जळगाव मिरर | २१ फेब्रुवारी २०२६
यावलतालुक्यातील नायगाव येथे बेपत्ता झालेल्या ५३ वर्षीय इसमाचा मृतदेह गुरुवारी शेतातील विहिरीत आढळून आल्याने परिसरात खळबळ उडाली आहे. याप्रकरणी यावल पोलिस ठाणे येथे अकस्मात मृत्यूची नोंद करण्यात आली असून पुढील तपास सुरू आहे.
मिळालेल्या माहितीनुसार, नायगाव येथील रहिवासी दगडू लोटन पाटील (वय ५३) हे मंगळवारी घरातून कुणालाही न सांगता बाहेर गेले होते. सायंकाळपर्यंत ते परत न आल्याने कुटुंबीयांनी शोधाशोध केली; मात्र त्यांचा काहीच मागमूस लागला नाही. अखेर कुटुंबीयांनी यावल पोलिस ठाणे येथे हरवल्याची तक्रार दाखल केली होती. त्यानुसार पोलिसांनी परिसरात शोधमोहीम सुरू केली होती.
दरम्यान, गुरुवारी सकाळी नायगाव शिवारातील गट क्रमांक ७४ मधील एका शेतातील विहिरीत मृतदेह तरंगताना आढळून आला. शेतात काम करणाऱ्या मजुरांच्या निदर्शनास ही बाब येताच त्यांनी तात्काळ पोलिस पाटलांना माहिती दिली. घटनेची माहिती मिळताच पोलिसांनी तत्काळ घटनास्थळी धाव घेतली व ग्रामस्थांच्या मदतीने मृतदेह विहिरीतून बाहेर काढला.
मृतदेहाची ओळख दगडू लोटन पाटील अशी पटली. त्यानंतर मृतदेह पुढील तपासणीसाठी ग्रामीण रुग्णालय, यावल येथे हलविण्यात आला. शवविच्छेदनाची प्रक्रिया पूर्ण झाल्यानंतर मृतदेह कुटुंबीयांच्या ताब्यात देण्यात आला. या घटनेमुळे नायगाव परिसरात हळहळ व्यक्त होत असून मृत्यूचे नेमके कारण शवविच्छेदन अहवालानंतर स्पष्ट होणार असल्याचे पोलिसांनी सांगितले. पुढील तपास सुरू आहे.
