जळगाव मिरर | २२ फेब्रुवारी २०२६
क्रिप्टो करन्सी ट्रेडिंगमधून मोठा नफा मिळवून देण्याचे आमिष दाखवत अमळनेर येथील डॉ. अनिल नथ्थू शिंदे (वय ७०) यांची तब्बल १ कोटी ६५ लाख ५७ हजार २०४ रुपयांची ऑनलाइन फसवणूक झाल्याची धक्कादायक घटना उघडकीस आली आहे. २९ जानेवारी ते १९ फेब्रुवारीदरम्यान हा प्रकार घडला. याप्रकरणी सायबर पोलिस ठाण्यात झासी प्रवीण पाटील या महिलेसह तिच्या साथीदारांविरुद्ध गुन्हा दाखल करण्यात आला आहे.
मिळालेल्या माहितीनुसार, अमळनेर येथील एका वैद्यकीय फाउंडेशनमध्ये कार्यरत असलेले डॉ. शिंदे यांना २९ जानेवारी रोजी Facebook वर झासी पाटील नावाच्या महिलेची ‘फ्रेंड रिक्वेस्ट’ आली. त्यांनी ती स्वीकारल्यानंतर दोघांमध्ये साधारण संवाद सुरू झाला. काही दिवसांतच संबंधित महिलेने ‘इंटरनॅशनल ट्रेडिंग’मध्ये गुंतवणूक केल्यास मोठा परतावा मिळेल, अशी माहिती देत विश्वास संपादन केला.
९ फेब्रुवारी रोजी तिने पुन्हा संपर्क साधून क्रिप्टो करन्सी ट्रेडिंगमध्ये गुंतवणुकीची संधी असल्याचे सांगितले. गुंतवणुकीसाठी एक लिंक पाठवून अॅप डाऊनलोड करण्यास सांगितले. सुरुवातीला डॉ. शिंदे यांनी ७० हजार रुपये ऑनलाइन पाठवले. त्यावर अॅपमध्ये १ लाख ५३ हजार २१ रुपये नफा झाल्याचे दर्शविण्यात आले. वाढता नफा पाहून त्यांनी टप्प्याटप्प्याने मोठी रक्कम गुंतवली.
विश्वास पूर्णपणे जिंकल्यानंतर ऑनलाइन ठगांनी वेळोवेळी एकूण १ कोटी ६५ लाख ५७ हजार २०४ रुपये स्वीकारले. अॅपवर या गुंतवणुकीवर ३ कोटी ९१ लाख ८७ हजार ७६६ रुपये नफा झाल्याचे दाखविण्यात येत होते. मात्र, ती रक्कम काढण्याची मागणी केली असता २० टक्के ‘व्हेरिफिकेशन फी’ म्हणून ६५ लाख ३१ हजार २९४ रुपये भरण्याची अट घालण्यात आली.
अतिरिक्त रक्कम भरणे शक्य नसल्याचे सांगत डॉ. शिंदे यांनी आधी गुंतवलेली रक्कम परत देण्याची विनंती केली. मात्र, उडवाउडवीची उत्तरे देत संबंधितांनी पैसे परत देण्यास नकार दिला. फसवणूक झाल्याचे लक्षात येताच त्यांनी सायबर पोलिस ठाण्यात धाव घेतली.
या प्रकरणाचा पुढील तपास पोलिस निरीक्षक सतीश गोराडे करीत असून संबंधित आरोपींचा शोध सुरू आहे. दरम्यान, सोशल मीडियावरील अनोळखी व्यक्तींच्या गुंतवणुकीच्या आमिषांना बळी न पडण्याचे आवाहन सायबर पोलिसांकडून करण्यात आले आहे. मोठा आणि झटपट नफा, अज्ञात अॅप्स व ‘व्हेरिफिकेशन फी’च्या नावाखाली मागितली जाणारी अतिरिक्त रक्कम ही सायबर फसवणुकीची ठळक लक्षणे असल्याचे तज्ज्ञांनी नमूद केले आहे.
