जळगाव मिरर | २४ फेब्रुवारी २०२६
छत्रपती संभाजी नगरकडून जळगावकडे भरधाव वेगाने जाणाऱ्या ट्रकने मजुरांच्या दुचाकीला दिलेल्या जबर धडकेत एक मजूर जागीच ठार झाला, तर दुचाकी चालक गंभीर जखमी झाल्याची घटना राष्ट्रीय महामार्ग ७५३वरील साई हॉटेलसमोर सोमवारी दुपारी सुमारे ४.१५ वाजता घडली.
सविस्तर वृत्त असे की , शेतातून मका कापणीचा सौदा करून घरी परतत असताना ईश्वर भानुदास सोनवणे (वय ४५) व शाम यादव चौधरी (वय ३०) यांच्या दुचाकी (एमएच १९, डीबी २९५०) ला मागून भरधाव येणाऱ्या ट्रक (एमएच २०, सीटी-८०५३) ने जबर धडक दिली. ही धडक इतकी भीषण होती की दुचाकी चेंडूप्रमाणे सुमारे ७ ते १० फूट उंच उडाली. या अपघातात दुचाकी मागे बसलेले ईश्वर सोनवणे यांचा जागीच मृत्यू झाला, तर चालक शाम चौधरी गंभीर जखमी झाले आहेत. जखमी शाम चौधरी यांना पुढील उपचारासाठी जळगाव जिल्हा रुग्णालय व वैद्यकीय महाविद्यालयात दाखल करण्यात आले असून त्यांची प्रकृती गंभीर आहे.
दरम्यान, समोरून येणाऱ्या आणखी एका दुचाकीस्वारालाही ट्रकची धडक बसली. मात्र, प्रसंगावधान राखून उडी घेतल्याने त्यांचा जीव वाचला. दरम्यान, महामार्गावरील सद्दाम शेख व सचिन पाटील यांनी तत्काळ जखमींना आपल्या दुचाकीवरून पहुर येथील ग्रामीण रुग्णालय हलवले. दरम्यान, पळून जाणाऱ्या ट्रक चालकाला ऑटोचालक इमरान भाई याने पाठलाग करून मेट्रो वाईन शॉपजवळ पकडले. दरम्यान, मद्यप्राशन करून ट्रक चालवणाऱ्या चालकास पोलिसांनी ताब्यात घेतले असून गुन्हा दाखल करण्यात आला आहे.
