जळगाव मिरर | ६ मार्च २०२६
यावल तालुक्यातील शिरसाड येथील तरुणी शेत शिवारात एका शेतात विहिरीजवळ असलेल्या गुलाबाच्या झाडावरून फुलं तोडत होती. दरम्यान फुलं तोडत असतांना अचानक तिचा तोल गेला आणि ती विहिरीत कोसळून पाण्यात बुडाली. ही घटना बुधवारी सकाळी घडली. तातडीने तिला विहिरीतून काढून यावल ग्रामीण रूग्णालयात आणण्यात आले. येथे डॉक्टरांनी तपासणी करून तिला मृत घोषित केले. याप्रकरणी यावल पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, शिरसाड ता. यावल येथील रहिवाशी लक्ष्मी दिलीप सपकाळे (वय २२) ही बुधवारी गावा लगत असलेल्या रमेश शिवदास बडगुजर यांच्या शेत गट क्रमांक ७७ मध्ये गेली होती. तेथे विहिरीजवळ असलेल्या गुलाबाच्या झाडावरून ती गुलाबाचे फुल तोडत होती. दरम्यान अचानक फुलं तोडत असताना तिचा तोल गेला आणि ती विहिरीत कोसळली. हा प्रकार निदर्शनास येताच तातडीने नागरिकांनी विहिरीजवळ धाव घेतली. तिला विहिरीच्या पाण्यातून काढून तातडीने उपचाराकरिता यावल ग्रामीण रुग्णालयात आणण्यात आले. येथे डॉक्टरांनी तपासणी करून तिला मयत घोषित केले.
याप्रकरणी यावल पोलीस ठाण्यात किरण दिलीप सपकाळे यांनी दिलेल्या खबरीवरून अकस्मात मृत्यूची नोंद करण्यात आली आहे. पुढील तपास पोलीस निरीक्षक रंगनाथ धारबळे यांच्या मार्गदर्शनाखाली पोलीस हवालदार रोहील गणेश करीत आहे.
