जळगाव मिरर | ८ मार्च २०२६
बंगल्यावरील पाण्याच्या टाकीची साफसफाई करत असताना पाय घसरून दुसऱ्या मजल्यावरून खाली पडल्याने एका कामगाराचा दुर्देवी मृत्यू झाल्याची घटना शुक्रवारी सायंकाळी नयनतारा गेस्ट हाऊस शेजारी असलेल्या मनोहर व्हिला बंगल्यात घडली. विठ्ठल ढोमण चौधरी (वय ४२, रा. पिंप्री, ता. धरणगाव) असे मृत कामगाराचे नाव आहे. याप्रकरणी रामानंद नगर पोलीस ठाण्यात अकस्मात मृत्यूची नोंद करण्यात आली आहे.
सविस्तर वृत्त असे कि, धरणगाव तालुक्यातील पिंप्री येथील विठ्ठल चौधरी हे शहरातील एका नामांकित कापड दुकानात काम करत होते. कुटुंबाचा उदरनिर्वाह करण्यासाठी ते गेल्या अनेक वर्षांपासून मेहनत घेत होते. दरम्यान, ६ तारखेला दुकान मालकाने त्यांना नयनतारा रेस्ट हाऊस शेजारी असलेल्या मनोहर व्हिला या बंगल्यात साफसफाईच्या कामासाठी पाठविले होते. साफसफाईदरम्यान दुसऱ्या मजल्यावर असलेल्या पाण्याच्या टाकीची स्वच्छता करत असताना अचानक त्यांचा तोल गेला. त्यामुळे ते थेट दुसऱ्या मजल्यावरून खाली कोसळले. या अपघातात त्यांच्या डोक्याला गंभीर दुखापत झाली.
घटना लक्षात येताच स्थानिकांनी त्यांना तातडीने जिल्हा शासकीय वैद्यकीय महाविद्यालय व रुग्णालयात दाखल केले. मात्र, डॉक्टरांनी तपासणी केल्यानंतर त्यांना मृत घोषित केले. या घटनेची माहिती मिळताच रामानंद नगर पोलिसांनी घटनास्थळी धाव घेत पंचनामा केला. याप्रकरणी पोलीस ठाण्यात अकस्मात मृत्यूची नोंद करण्यात आली असून पुढील तपास सुरू आहे. दरम्यान, विठ्ठल चौधरी यांच्या निधनामुळे त्यांच्या कुटुंबावर दुःखाचा डोंगर कोसळला आहे. त्यांच्या पश्चात आई, पत्नी, दोन मुली व एक मुलगा असा परिवार आहे. कुटुंबातील कर्ता व्यक्ती अचानक गेल्याने परिसरात हळहळ व्यक्त होत आहे.
