जळगाव मिरर | ८ मार्च २०२६
रायगड जिल्ह्यातील रेवस-रेड्डी मार्गावर झालेल्या भीषण अपघातात अलिबाग वनविभागातील वनरक्षक सुरज सारंगे यांचा दुर्दैवी मृत्यू झाला. या घटनेमुळे परिसरात हळहळ व्यक्त होत असून वनविभागातही शोककळा पसरली आहे. विशेष म्हणजे काही दिवसांपूर्वीच त्यांच्या घरी जुळ्या बाळांचा जन्म झाला होता आणि कुटुंबात आनंदाचे वातावरण असतानाच काही तासांतच ही दुर्दैवी घटना घडल्याने कुटुंबावर दुःखाचा डोंगर कोसळला आहे.
मिळालेल्या माहितीनुसार, मुरूड तालुक्यातील सर्वे गावचे रहिवासी असलेले सुरज सारंगे हे अलिबाग वनविभागाच्या तिनविरा येथे वनरक्षक म्हणून कार्यरत होते. शुक्रवारी (६ मार्च) रात्री उशिरा ते आपल्या दुचाकीवरून घरी जात असताना रेवस-रेड्डी मार्गावर सुरू असलेल्या कामादरम्यान खोदून ठेवलेल्या खोल मोरीत त्यांची दुचाकी अचानक कोसळली. या अपघातात त्यांना गंभीर दुखापत झाली आणि त्यांचा जागीच मृत्यू झाला.
योगायोग असा की, याच दिवशी त्यांच्या जुळ्या बाळांना रुग्णालयातून घरी आणण्यात आले होते. घरात नव्या पाहुण्यांच्या आगमनाचा आनंद साजरा होत असतानाच काही तासांतच झालेल्या अपघाताने कुटुंबीयांवर दुःखाचा डोंगर कोसळला. सारंगे यांनी या आनंदाचा क्षण आपल्या मोबाईल स्टेटसवरही व्यक्त केला होता, अशी माहिती कुटुंबीयांनी दिली.
दरम्यान, रेवस-रेड्डी मार्गावर सुरू असलेल्या कामादरम्यान खोदलेल्या खड्ड्याभोवती कोणतीही सुरक्षाव्यवस्था नव्हती, असा आरोप स्थानिक नागरिकांनी केला आहे. त्या ठिकाणी बॅरिकेट्स, सूचना फलक, रेडियम पट्ट्या किंवा रात्री वाहनचालकांना दिसण्यासाठी लाल दिवे लावलेले नव्हते. त्यामुळेच हा अपघात घडल्याचा आरोप करत संबंधितांवर कारवाईची मागणी स्थानिकांकडून केली जात आहे. कर्तव्यदक्ष वनरक्षकाचा अशा प्रकारे मृत्यू झाल्याने स्थानिक नागरिकांसह वनविभागातील अधिकारी आणि कर्मचाऱ्यांमध्ये शोक व्यक्त करण्यात येत आहे.
