जळगाव मिरर | १३ मार्च २०२६
मोहाडी रस्त्यावरील पेट्रोल पंपावर पेट्रोल भरण्यासाठी गेलेल्या ६४ वर्षीय व्यावसायिकाला अचानक चक्कर येऊन पडल्याने त्यांचा मृत्यू झाल्याची घटना बुधवारी दुपारी घडली. या प्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, रायसोनी नगरातील रहिवासी विरेंद्र रुढाभाई जैठवा (वय ६४) हे शहरातील परिचित किराणा व्यावसायिक होते. बुधवारी दुपारी ते आपल्या वाहनात पेट्रोल भरण्यासाठी मोहाडी रस्त्यावरील पेट्रोल पंपावर गेले होते. पेट्रोल भरत असतानाच त्यांना अचानक चक्कर आली आणि ते खाली कोसळले. ही घटना पाहताच तेथील नागरिकांनी तातडीने धाव घेत त्यांना उचलून जवळच्या खासगी रुग्णालयात उपचारासाठी दाखल केले. मात्र त्यांची प्रकृती अधिकच खालावल्याने त्यांचा मुलगा वैभव जैठवा यांनी त्यांना पुढील उपचारासाठी जीएमसी रुग्णालयात हलविले.
तेथे डॉक्टरांनी तपासणी केल्यानंतर त्यांना मृत घोषित केले. या घटनेची माहिती मिळाल्यानंतर एमआयडीसी पोलीस ठाण्यात अकस्मात मृत्यूची नोंद करण्यात आली असून पुढील तपास हेड कॉन्स्टेबल गफुर तडवी हे करीत आहेत. या घटनेमुळे परिसरात हळहळ व्यक्त केली जात असून जैठवा कुटुंबावर दुःखाचा डोंगर कोसळला आहे.
