जळगाव मिरर | १६ मार्च २०२६
शहरातील नवीन बसस्थानक परिसरातून मोटारसायकल चोरी करणाऱ्या मालेगाव येथील तिघा संशयितांना जिल्हापेठ पोलिसांनी अटक केली असून चोरीची दुचाकी जप्त करण्यात आली आहे. या प्रकरणी पोलिसांनी गुन्हा दाखल करून पुढील तपास सुरू केला आहे.
मिळालेल्या माहितीनुसार, जळगाव शहरातील नवीन बसस्थानक परिसरातून मोटारसायकल चोरी झाल्याची घटना घडली होती. या प्रकरणी जिल्हा पेठ पोलीस स्थानक येथे क्रमांक ४३/२०२६ अन्वये भारतीय न्याय संहिता कलम ३०३(२) व ३(५) अंतर्गत दिनांक २६ फेब्रुवारी २०२६ रोजी गुन्हा दाखल करण्यात आला होता.
गुन्ह्याचा तपास सुरू असताना पोलिसांना मिळालेल्या गोपनीय माहितीच्या आधारे जिल्हापेठ पोलिसांचे विशेष पथक तयार करण्यात आले. तांत्रिक विश्लेषणाच्या मदतीने संशयितांचा शोध घेत पोलिसांनी आरोपी मलीक अल्ताफ अहमद अन्सारी, मोहम्मद मुज्जमील अब्दुल खालक आणि अबुबकर नईम कौसर (रा. मालेगाव) याला ताब्यात घेतले. चौकशीदरम्यान आरोपींनी जळगाव येथील बसस्थानकातून हिरो होंडा स्प्लेंडर प्लस (क्र. MH19 BS 1573) ही मोटारसायकल चोरी केल्याची कबुली दिली. त्यानुसार संबंधित दुचाकी पोलिसांनी जप्त केली आहे.
पोलिस कोठडीत चौकशीदरम्यान आरोपींनी आणखी माहिती देताना सांगितले की, ते नाशिक येथून टीव्हीएस रायडर (क्र. MH15 JF 3609) या मोटारसायकलवर जळगावला आले होते. त्यानंतर ही मोटारसायकल एका साक्षीदाराला विकण्याचे आश्वासन देऊन कागदपत्रे नंतर देऊ असे सांगितले आणि त्याच मोटारसायकलवर बसस्थानकापर्यंत सोडण्यास सांगितले. तेथून त्यांनी स्प्लेंडर मोटारसायकल चोरी करून ती मालेगाव येथे नेल्याची कबुली दिली. सदर प्रकरणात तिघा आरोपींना न्यायालयाने तीन दिवसांची पोलिस कोठडी सुनावली होती. पुढील तपास पोलीस नाईक संतोष सोनवणे करीत आहेत.
या कारवाईत डॉ. महेश्वर रेड्डी, अपर पोलीस अधीक्षक अशोक नखाते , उपविभागीय पोलीस अधिकारी नितीन गणापुरे तसेच सहाय्यक पोलीस निरीक्षक अनिल वाघ यांच्या मार्गदर्शनाखाली पोउपनिरीक्षक शांताराम देशमुख, पोह महेश महाजन, नरेश सोनवणे, संतोष सोनवणे तसेच पोलिस कर्मचारी तेजस मराठे, राहुल पाटील, नरेंद्र दिवेकर, अमित मराठे व प्रविण जाधव यांनी ही कारवाई केली.
