जळगाव मिरर | १८ मार्च २०२६
शासकीय स्टॅम्प विक्रीमध्ये अतिरिक्त पैसे उकळण्याचा प्रकार उघडकीस आला असून, पाच हजार रुपयांच्या स्टॅम्पसाठी ५०० रुपयांची लाच घेताना स्टॅम्प वेंडर योगेश ईश्वरलाल संघवी (वय ४९) व झेरॉक्स दुकानदार प्रशांत ईश्वरलाल संघवी (रा. विवेकानंद नगरी, पाचोरा) यांना लाचलुचपत प्रतिबंधक विभागाच्या पथकाने मंगळवारी (दि. १७) रंगेहाथ पकडले. या प्रकरणी पाचोरा पोलिस ठाण्यात गुन्हा दाखल करण्यात आला आहे.
मिळालेल्या माहितीनुसार, तक्रारदार दि. १५ रोजी पाचोरा शहरातील भडगाव रस्त्यावर असलेल्या प्रशांत झेरॉक्स दुकानात ५०० रुपयांचे दहा स्टॅम्प खरेदी करण्यासाठी गेले होते. यावेळी स्टॅम्प वेंडर योगेश संघवी यांनी एका स्टॅम्पची किंमत ५५० रुपये असल्याचे सांगत, प्रत्यक्ष किमतीपेक्षा जादा पैसे मागितले. तसेच तक्रारदारांकडे आधारकार्ड नसल्याचे कारण देत, ‘आधारकार्ड आणल्याशिवाय स्टॅम्प मिळणार नाहीत’ असे सांगून त्यांना अडवण्यात आले.
या प्रकारामुळे संशय आल्याने तक्रारदारांनी लाचलुचपत प्रतिबंधक विभागाकडे तक्रार नोंदवली. तक्रारीची पडताळणी करून पथकाने सापळा रचला. मंगळवारी तक्रारदार पुन्हा स्टॅम्प घेण्यासाठी गेले असता, स्टॅम्प वेंडर योगेश संघवी यांनी पाच हजार रुपयांच्या स्टॅम्पसाठी ५,५०० रुपये घेतले व त्यापैकी ५०० रुपये लाच म्हणून स्वीकारले. ठरलेल्या इशाऱ्यानंतर सापळा रचून बसलेल्या पथकाने तत्काळ कारवाई करत योगेश संघवी आणि प्रशांत संघवी या दोघांना रंगेहाथ पकडले.
ही कारवाई पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक हेमंत नागरे, बाळू मराठे आणि भूषण पाटील यांच्या पथकाने यशस्वीरित्या पार पाडली. पुढील तपास पोलीस निरीक्षक स्मिता नवघरे करीत आहेत. या घटनेमुळे पाचोरा शहरात खळबळ उडाली असून, शासकीय सेवांमध्ये होणाऱ्या भ्रष्टाचाराविरोधात लाचलुचपत प्रतिबंधक विभागाने पुन्हा एकदा ठोस कारवाई केल्याचे स्पष्ट झाले आहे.
