जळगाव मिरर | १९ मार्च २०२६
कर्तव्य बजावत असलेला तरुण अग्निशमन जवान प्रफुल्ल सुनील पाटील (वय २२, मूळ रा. भोकर, ता. जळगाव) याचा भरधाव अज्ञात वाहनाच्या धडकेत दुर्दैवी मृत्यू झाल्याची घटना मंगळवार, दि. १७ मार्च रोजी रात्री साडेदहा वाजण्याच्या सुमारास चापी येथे घडली. या अचानक घडलेल्या अपघातामुळे पाटील कुटुंबावर दुःखाचा डोंगर कोसळला असून भोकर गावासह परिसरात हळहळ व्यक्त होत आहे.
जळगाव तालुक्यातील भोकर गावचा रहिवासी प्रफुल्ल पाटील हे वापी येथील अग्निशमन विभागात गेल्या दीड वर्षांपासून सेवा बजावत होता. मंगळवारी रात्री आपली ड्युटी पूर्ण करून तो नेहमीप्रमाणे आपल्या राहत्या खोलीवर परतला. जेवण आटोपल्यानंतर तो थोडा वेळ फेरफटका मारण्यासाठी बाहेर पडला होता. याच वेळी चापी परिसरात भरधाव वेगाने येणाऱ्या एका अज्ञात वाहनाने त्याला जोरदार धडक दिली.
या भीषण अपघातात प्रफुल्ल पाटील याचा जागीच मृत्यू झाला. अपघातानंतर वाहनचालक घटनास्थळावरून फरार झाला असून पोलिसांकडून त्याचा शोध सुरू आहे. या घटनेने परिसरात हळहळ व्यक्त केली जात आहे.
प्रफुल्ल हा अत्यंत मेहनती, कर्तव्यदक्ष आणि होतकरू युवक म्हणून ओळखला जात होता. अवघ्या २१ व्या वर्षी त्याने अग्निशमन विभागात प्रवेश मिळवला होता. घरची आर्थिक परिस्थिती सुधारावी, कुटुंबाला आधार मिळावा या हेतूने तो बाहेरगावी नोकरी करत होता. त्याचे वडील सुनील पाटील हे भोकर येथे शेती करून कुटुंबाचा उदरनिर्वाह करतात. त्याच्या पश्चात आई, वडील, लहान भाऊ आणि आजी असा परिवार आहे. मुलाच्या आकस्मिक निधनामुळे संपूर्ण कुटुंबावर दुःखाचा डोंगर कोसळला आहे.
बुधवारी, दि. १८ मार्च रोजी प्रफुल्लचा मृतदेह वापी येथून त्याच्या मूळ गावी भोकर येथे आणण्यात आला. यावेळी गावात अत्यंत शोकाकुल वातावरण निर्माण झाले होते. ग्रामस्थांनी मोठ्या संख्येने अंत्यदर्शनासाठी गर्दी केली. शोकमग्न वातावरणात त्याच्यावर अंत्यसंस्कार करण्यात आले. या घटनेमुळे भोकर गावासह संपूर्ण परिसरात हळहळ व्यक्त होत असून, संबंधित अज्ञात वाहनचालकाला तातडीने अटक करण्याची मागणी नागरिकांकडून करण्यात येत आहे.
