जळगाव मिरर | २० मार्च २०२६
अवैध वाळू उत्खनन व वाहतुकीवर कारवाई करण्यासाठी गेलेल्या महसूल विभागाच्या पथकावर हल्ला झाल्याची धक्कादायक घटना भडगाव तालुक्यात उघडकीस आली आहे. या प्रकरणी मंडळ अधिकाऱ्यास मारहाण करून शासकीय कामात अडथळा निर्माण केल्याप्रकरणी चार संशयितांविरुद्ध गंभीर कलमान्वये गुन्हा दाखल करण्यात आला आहे.
मिळालेल्या माहितीनुसार, गिरड मंडळाचे अधिकारी दिनेश लक्ष्मणराव येडे हे त्यांच्या पथकासह पिंपरखेड परिसरात अवैध वाळू वाहतुकीवर लक्ष ठेवण्यासाठी गस्त घालत होते. यावेळी त्यांना निळ्या रंगाचे स्वराज ट्रॅक्टर (एमएच-२०, जीक्यू-१६८०) वाळूने भरलेले आढळले. पथकाने ट्रॅक्टर थांबवण्याचा प्रयत्न केला असता चालकाने ते वेगाने पळवून नेले.
काही अंतरावर ट्रॅक्टर अडवल्यानंतर त्यात सुमारे सव्वा ब्रास वाळू असल्याचे आढळून आले. दरम्यान, योगेश गंजे, तेजस पाटील आणि हेमंत शिंदे हे स्विफ्ट डिझायर (एमएच-०३, बीई-५४३७) गाडीतून घटनास्थळी पोहोचले आणि त्यांनी पथकाशी वाद घालत शासकीय कामात अडथळा निर्माण केला.
यानंतर संजय त्रिभुवन व योगेश गंजे यांनी मंडळ अधिकारी दिनेश येडे यांना गाडीतून खाली ओढून मारहाण केली. संजय त्रिभुवन याने लोखंडी वस्तूने येडे यांच्या गालावर प्रहार केला, ज्यामुळे ते जखमी झाले. तसेच इतर कर्मचाऱ्यांनाही मारहाण करण्यात आली. या गोंधळाचा फायदा घेत ट्रॅक्टर चालक घटनास्थळावरून पसार झाला.
जखमी अधिकाऱ्यांनी ग्रामीण रुग्णालयात उपचार घेतल्यानंतर पोलिसांत तक्रार दाखल केली. येडे यांच्या फिर्यादीवरून संजय त्रिभुवन (रा. वाक, ता. भडगाव), योगेश सुरेश गंजे, तेजस रवींद्र पाटील आणि हेमंत शिंदे (सर्व रा. भडगाव) यांच्याविरुद्ध भारतीय न्याय संहिता २०२३ अंतर्गत विविध कलमान्वये गुन्हा दाखल करण्यात आला आहे. या घटनेमुळे परिसरात खळबळ उडाली असून, पुढील तपास पोलीस निरीक्षक महेश शर्मा यांच्या मार्गदर्शनाखाली सुरू आहे.
