जळगाव मिरर | २१ मार्च २०२६
शहरातील एमआयडीसी परिसरातील एका कंपनीमध्ये काम करीत असताना महिलेचा स्कार्प मशीनमध्ये अडकल्याने सदर महिला गंभिर जखमी झाल्याची घटना दि. १७ रोजी घडली होती. या घटनेतील जखमी जमुना रामकरण पाटील (४५, रा. जामोद, जि. खंडवा, मध्यप्रदेश) यांच्यावर तीन दिवसांपासून उपचार होते, दि. २० रोजी अखेर त्यांची प्राणज्योत मालवली असून या प्रकरणी – एमआयडीसी पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, मध्यप्रदेशातील जमुना पाटील, त्यांचे पती रामकरण पाटील हे एमआयडीसीतील डी-६ सेक्टरमधील आर.सी. फूड या कंपनीत कामाला होते. नेहमीप्रमाणे सदर महिला कंपनीत काम करीत असताना १७ मार्च रोजी तिच्या गळ्यातील स्कार्प मशीनमध्ये अडकला व केसांसहीत ती मशीनमध्ये ओढल्या गेल्या. त्यात डोक्याला गंभीर दुखापत झाल्याने महिलेला खासगी रुग्णालयात दाखल करण्यात आले. तीन दिवसांपासून उपचार सुरू असलेल्या या महिलेचा अखेर २० मार्च रोजी मृत्यू झाला. मृतदेह मध्यप्रदेशात मूळ गावी नेण्यात आला. या प्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे. पुढील तपास पोहेकों गणेश शिरसाळे करीत आहेत. मयत महिलेच्या पश्चात पती, एक मुलगा, एक मुलगी असा परिवार आहे.
