परीक्षेत गैरप्रकाराचा प्रयत्न उधळला; अमळनेरमध्ये दोघांविरुद्ध गुन्हा
जळगाव मिरर | २१ मार्च २०२६
परीक्षेदरम्यान कॉपी पुरवण्यास नकार दिल्याचा राग मनात धरून दोन जणांनी एका होमगार्डवर लोखंडी रॉडने हल्ला करून जखमी केल्याची धक्कादायक घटना १४ रोजी रात्री साडेआठ वाजेच्या सुमारास अमळनेर शहरातील भारत गॅस गोदामाजवळ घडली. या प्रकरणी उशिराने अमळनेर पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, डी.डी. नगर येथील भूषण पाटील याचा भाऊ पीयूष पाटील हा एन. टी. मुंदडा माध्यमिक विद्यालयात परीक्षा देत होता. त्याला कॉपी पुरवण्यासाठी मदत कर, अशी विनंती अनिकेत राजेंद्र पाटील (रा. डी.डी. नगर) याने ड्युटीवर असलेल्या होमगार्ड राकेश पुरुषोत्तम चौधरी यांना केली. मात्र, होमगार्ड चौधरी यांनी नियमांचे पालन करत स्पष्ट नकार दिला.
यामुळे संतप्त झालेल्या अनिकेतने शिवीगाळ करत चौधरी यांना खाली पाडले. त्यानंतर भूषण पाटीलने त्यांना पकडून ठेवले, तर अनिकेतने लाथाबुक्क्यांनी मारहाण केली. इतकेच नव्हे तर लोखंडी रॉडने त्यांच्या डोक्यावर वार करण्याचा प्रयत्न केला. मात्र, चौधरी यांनी प्रसंगावधान राखत वार चुकवला. तरीही तो वार त्यांच्या चेहऱ्यावर लागल्याने ते जखमी झाले. घटनेनंतर परिसरात काही काळ तणावाचे वातावरण निर्माण झाले होते. जखमी होमगार्ड यांच्यावर उपचार करण्यात आले असून, त्यांनी उशिराने अमळनेर पोलीस ठाण्यात फिर्याद दिली.
या फिर्यादीवरून अनिकेत राजेंद्र पाटील व भूषण पाटील यांच्याविरुद्ध विविध कलमांनुसार गुन्हा दाखल करण्यात आला असून, पुढील तपास हेड कॉन्स्टेबल संदेश पाटील करीत आहेत. परीक्षेदरम्यान गैरप्रकार रोखण्यासाठी कर्तव्य बजावणाऱ्या होमगार्डवरच हल्ला झाल्याने संताप व्यक्त केला जात असून, या घटनेमुळे परीक्षेच्या सुरक्षेचा प्रश्नही ऐरणीवर आला आहे.
