जळगाव मिरर | २४ मार्च २०२६
शब्दांना जेव्हा काळजाची ओढ लागते, तेव्हा एक सुंदर प्रेमकथा जन्माला येते. याचाच प्रत्यय नुकताच पार पडलेल्या एका आगळ्यावेगळ्या पुस्तक प्रकाशन सोहळ्यात आला. युवा लेखक चिन्मय महाजन लिखित ‘तुम्हारे ही रहेंगे हम’ या नव्या हिंदी प्रेमकादंबरीचे प्रकाशन अत्यंत उत्साहात आणि जिव्हाळ्याच्या वातावरणात संपन्न झाले.
या कार्यक्रमाचे सर्वात मोठे वैशिष्ट्य म्हणजे या पुस्तकाचे प्रकाशन कोणत्याही राजकीय नेत्याच्या किंवा मोठ्या अतिथीच्या हस्ते न होता, चिन्मय यांच्या जवळच्या मित्रमंडळींच्या हस्ते करण्यात आले. “माझ्या जीवनाच्या प्रवासात माझ्या मित्रांनी मला खंबीर साथ दिली, त्यामुळे माझ्या जीवनातील पहिल्या यशाचे पहिले मानकरी माझे मित्रच असावेत,” अशी कृतज्ञता लेखक चिन्मय महाजन यांनी यावेळी व्यक्त केली. कोणत्याही औपचारिकतेपेक्षा मैत्रीचा ओलावा या सोहळ्यात अधिक भावला.
‘तुम्हारे ही रहेंगे हम’ ही एक हृदयस्पर्शी हिंदी प्रेमकथा आहे. आजच्या काळातील प्रेम, त्यातील गुंतागुंत, समर्पण आणि भावनांचा प्रवास चिन्मय यांनी अत्यंत प्रभावीपणे मांडला आहे. हिंदी भाषेतील गोडवा आणि कथेतील ओघवतेपणा यामुळे हे पुस्तक वाचकांना शेवटपर्यंत खिळवून ठेवणारे ठरेल, असा विश्वास उपस्थित मित्रांनी व्यक्त केला.
या प्रकाशन सोहळ्याचा प्रत्येक क्षण मैत्री आणि साहित्याच्या प्रेमाने भारावलेला होता. औपचारिक भाषणांना फाटा देत, व्यासपीठावर मित्रांनी एकत्र येऊन अत्यंत साध्या पण प्रभावी पद्धतीने पुस्तकाचे अनावरण केले, जे या सोहळ्याचे मुख्य आकर्षण ठरले. लेखक चिन्मय महाजन यांनी यावेळी आपल्या लेखन प्रवासातील चढ-उतार आणि या पुस्तकामागील प्रेरणेवर प्रकाश टाकला. विशेष म्हणजे, सोशल मीडियावर या पुस्तकाची आधीपासूनच चर्चा असल्याने तरुण वाचकांमध्ये मोठी उत्सुकता पाहायला मिळाली. उपस्थित मित्रांनी केवळ पुस्तकाचे कौतुकच केले नाही, तर त्यातील काही हळव्या प्रसंगांवर मनमोकळी चर्चा करत या सोहळ्याची रंगत वाढवली.
मैत्री आणि प्रेमाचा हा अनोखा संगम असणारे हे पुस्तक आता सर्व प्रमुख पुस्तक विक्रेत्यांकडे आणि ऑनलाइन प्लॅटफॉर्मवर उपलब्ध झाले आहे. लेखक चिन्मय महाजन यांच्या या नव्या झेप बद्दल सर्व स्तरांतून त्यांचे कौतुक होत आहे.
