जळगाव मिरर | २८ मार्च २०२६
जळगाव महानगर पालिकेतील ७ स्वीकृत नगरसेवक निवडीसाठी नामनिर्देशन अर्ज दाखल करण्यात आले असून शुक्रवारी झालेल्या अर्ज छाननी प्रक्रियेत पाच अर्ज वैध ठरले आहेत. यात भाजपचे तीन तर शिवसेनेच्या दोन उमेदवारांचा सामावेश आहे. तसेच भाजपच्या दोन अर्जात तांत्रिक त्रुटी असल्यामुळे भाजपला मुदत वाढ देण्यात आली आहे. तर, शिवसेना उद्धव बाळासाहेब ठाकरे पक्षाच्या गटनेत्यांबाबत संभ्रम असल्यामुळे ठाकरे गटाच्या स्वीकृत नगरसेवकाचा विषय प्रलंबित ठेवण्यात आला आहे.
महापालिकेत सात जागांवर स्वीकृत नगरसेवक निवडीची अर्ज छाननीची प्रक्रिया आयुक्त ज्ञानेश्वर ढेरे यांच्या दालनात झाली. यावेळी नगरसचिव सतीश शुक्ला उपस्थित होते. अर्ज छाननी प्रक्रियेत भाजपकडून दाखल केलेल्या अर्जात डॉ. राधेश्याम चौधरी, प्रदीप रोटे आणि रमेश मताणी यांचे तर शिवसेनेकडून हर्षल मावळे व नरेंद्र सोनवणे या पाचही जणांच्या कागदपत्रांची पूर्तता झाल्याने त्यांन स्वीकृत नगरसेवक पदाची संधी मिळणे आत निश्चित मानले जात आहे.
स्वीकृत सदस्यांच्या अर्ज छाननी प्रसंगी भाजपचे गटनेते प्रकाश बालाणी, नितीन लढा विशाल त्रिपाठी यांच्यासह शिवसेनेकडून माजी महापौर तथा जिल्हाध्यक्ष विष्णू भंगाळे नगरसेवक अॅड. दिलीप पोकळे, गणेश सोनवणे, कुंदन काळे उपस्थित होते. तसेच शिवसेना उबाठाचे जिल्हाध्यक्ष कुलभूषण पाटील, इब्राहिम पटेल, अर्शनाबी खाटीक शरद तायडे उपस्थित होते. यावेळी भाजप व दोन्ही शिवसेनेच्या नेत्यांकडून आयुक्तांच भेट घेऊन चर्चा केली.
शिवसेना उध्दव बाळासाहेब ठाकरे गटाचे गटनेते इब्राहिम पटेल यांनी युगंधरा सोळुंके यांचा अर्ज दाखल केला. युगंधरा सोळुंके ह्या भाजपच्या असतांना त्यांना शिवसेना ठाकरे गटाकडून उमेदवारी देण्यात येत असल्याची कुणकुण शिवसेना ठाकरे गटाचे जिल्हा प्रमुख कुलभूषण पाटील व महानगर प्रमुख शरद तायडे यांना लावली होती. त्यामुळे त्यांनी तातडीने दि. २२ रोजी गटनेता बदलून तसा प्रस्ताव दि. २३ रोजी विभागीय आयुक्तांना दिला. सदर प्रस्तावाची नोंद विभागीय आयुक्त कार्यालयात घेण्यात आली असून दि. २४ रोजी शिवसेना ठाकरे गटाच्या नवीन गटनेत्या म्हणून आर्शीनबानो शोएब खाटीक असल्याचे पत्र जिल्हा प्रमुख यांनी मनपा आयुक्तांना दिले. परंतु विभागीय आयुक्तांकडून पत्र आल्या शिवाय आपल्याला निर्णय घेता येणार नाही, असे सांगत मनपा आयुक्त ढेरे यांनी शिवसेनेचे स्वीकृत नगरसेवकांचा अर्ज प्रलंबित ठेवला आहे. दरम्यान, सायंकाळी विभागीय आयुक्तांचे पत्र मनपा आयुक्तांना प्राप्त झाले असून त्यात अर्शीनबानो खाटीक यांचा अर्ज दप्तरी दाखल करून घेण्यात आला असे नमुद करण्यात आले आहे.
भाजपच्या एका जागेसाठी मुदतवाढ भाजपने चार जागांसाठी पाच नावे सुचवली होती. त्यापैकी सुभाष शौचे आणि राहूल वाघ यांच्या कागदपत्रांमध्ये काही त्रुटी आढळून आल्या आहेत. या त्रुटींची पूर्तता करण्यासाठी त्यांना २ एप्रिलपर्यंत मुदत देण्यात आली आहे. या दोघांपैकी नेमकी कोणाची वर्णी लागते, याकडे आता सर्वांचे लक्ष लागले आहे.
