जळगाव मिरर | १ एप्रिल २०२६
शहरातील पिंप्राळा हुडको परिसरात किरकोळ कारणावरून दोन कुटुंबांमध्ये झालेल्या वादाचे रूपांतर जोरदार हाणामारीत झाले. या घटनेत दोन्ही बाजूंच्या सदस्यांनी एकमेकांना शिवीगाळ करत लोखंडी पाइपने मारहाण केल्याने अनेकजण गंभीर जखमी झाले. ही घटना दि. २९ मार्च रोजी रात्री घडली असून दोन्ही कुटुंबांच्या तक्रारीवरून परस्परविरोधात गुन्हे दाखल करण्यात आले आहेत.
मिळालेल्या माहितीनुसार, पिंप्राळा हुडको परिसरातील न्यू ख्वॉजानगर येथे वास्तव्यास असलेले उस्मान शहा इब्राहीम शहा यांच्या मुलीचा वाद संशयित आरिफ नादर शेख यांच्या मुलासोबत सुरू होता. रात्री सुमारे ८ वाजेच्या सुमारास हा वाद वाढला. उस्मान शहा आणि त्यांचा मुलगा वाद सोडवण्यासाठी गेले असता, आरिफ शेख, जुबेर शेख व अन्य एकाने त्यांच्यावर शिवीगाळ करत हल्ला चढवला. यावेळी लोखंडी पाइपने मारहाण करण्यात आल्याने तिघेही गंभीर जखमी झाले. जखमींवर जिल्हा रुग्णालयात उपचार सुरू असून त्यांच्या जबाबावरून रामानंद नगर पोलीस ठाण्यात गुन्हा दाखल करण्यात आला आहे. या प्रकरणाचा तपास पोहेकॉ योगेश माळी करीत आहेत.
दरम्यान, दुसऱ्या कुटुंबातील जुबेर शेख हकीम (वय ३०) यांनी दिलेल्या तक्रारीनुसार, उस्मान शेख हे दारूच्या नशेत त्यांच्या कुटुंबियांना शिवीगाळ करत होते. यामुळे वाद वाढून उस्मान शेख व त्यांच्या सहकाऱ्यांनी जुबेर शेख यांच्यासह त्यांच्या मामाला व जावयाला बेदम मारहाण केली. या घटनेत तेही जखमी झाले असून या प्रकरणी आरोफा शहा, शहनाद शहा, जाफर शहा आणि उस्मान शहा यांच्याविरुद्ध गुन्हा नोंदविण्यात आला आहे. या घटनेमुळे परिसरात काही काळ तणावाचे वातावरण निर्माण झाले होते. पोलिसांनी तत्काळ घटनास्थळी धाव घेत परिस्थिती नियंत्रणात आणली. पुढील तपास सुरू आहे.
