जळगाव मिरर | ४ एप्रिल २०२६
भुसावळ शहरात अवैध शस्त्र बाळगणाऱ्या व्यक्तींविरुद्ध पोलिसांनी सुरू केलेल्या विशेष मोहिमेत भुसावळ बाजारपेठ पोलीस स्टेशनच्या डी. बी. पथकाला महत्त्वाचे यश मिळाले आहे. श्रीराम नगर परिसरात गावठी पिस्तुल बाळगून संशयास्पद हालचाली करणाऱ्या एका तरुणाला पोलिसांनी ताब्यात घेतले असून त्याच्याकडून शस्त्र आणि जिवंत काडतूस जप्त करण्यात आले आहे.
पोलीस अधिक्षक जळगाव महेश्वर रेड्डी, अप्पर पोलीस अधिक्षक अशोक नखाते तसेच उप विभागीय पोलीस अधीकारी भुसावळ विभाग केदार बारबोले यांच्या मार्गदर्शनाखाली शहरात अवैध शस्त्रांवर कारवाई करण्याचे आदेश देण्यात आले होते. त्यानुसार डी. बी. पथक सक्रिय झाले होते.
गुप्त बातमीदाराकडून मिळालेल्या माहितीनुसार, श्रीराम नगर भागातील श्रीराम मंदिराजवळ एक व्यक्ती गावठी पिस्तुल घेऊन फिरत असून गंभीर गुन्हा करण्याच्या तयारीत असल्याची माहिती पोलिसांना मिळाली. या माहितीची पडताळणी करून पोलीस निरीक्षक राहुल वाघ यांच्या मार्गदर्शनाखाली पथकाने तातडीने सापळा रचला.
कारवाईदरम्यान संदीप सुनिल जाधव (वय 23, रा. कुमावत नगर, सहजयश अपार्टमेंट, मखमलाबाद रोड, पंचवटी, नाशिक) याला ताब्यात घेण्यात आले. त्याची अंगझडती घेतली असता त्याच्याकडून सुमारे 20 हजार रुपये किंमतीचे गावठी पिस्तुल मॅगझीनसह तसेच 1 हजार रुपये किंमतीचे एक जिवंत काडतूस हस्तगत करण्यात आले.
या प्रकरणी भुसावळ बाजारपेठ पोलीस स्टेशन येथे गुन्हा रजिस्टर नं. 162/2026 अन्वये आर्म्स अॅक्ट कलम 3/25 तसेच महाराष्ट्र पोलीस कायदा कलम 37, 135 नुसार गुन्हा दाखल करण्यात आला आहे. सदर प्रकरणाचा पुढील तपास उप विभागीय पोलीस अधीकारी केदार बारबोले व पोलीस निरीक्षक राहुल वाघ यांच्या मार्गदर्शनाखाली पोलीस हेड कॉन्स्टेबल विजय बळिराम नेरकर करीत आहेत. शहरात कायदा व सुव्यवस्था अबाधित ठेवण्यासाठी पोलिसांकडून अशा प्रकारच्या कारवाया पुढेही सुरू राहणार असल्याचे संकेत यानिमित्ताने मिळत आहेत.
