जळगाव मिरर | ४ एप्रिल २०२६
धरणगांव तालुक्यातील बांभोरी परिसरातील एका खासगी कंपनीत कार्यरत सिक्युरिटी इन्चार्जकडून महिला सिक्युरिटी गार्डवर अत्याचार करून तिचा अश्लील व्हिडिओ व्हायरल करण्याची धमकी दिल्याचा धक्कादायक प्रकार उघडकीस आला आहे. तसेच या प्रकरणाची वाच्यता केल्यास संपूर्ण कुटुंबाला जीवे मारण्याची धमकी देण्यात आल्याने परिसरात संताप व्यक्त होत आहे.
मिळालेल्या माहितीनुसार, जळगाव शहरात वास्तव्यास असलेली एक महिला बांभोरी येथील कंपनीत सिक्युरिटी गार्ड म्हणून काम करते. सप्टेंबर २०२५ मध्ये तिची मुलगी आजारी असल्याने तिला दोन दिवसांची रजा हवी होती. त्यासाठी ती सिक्युरिटी इन्चार्ज जनार्दन (पूर्ण नाव अज्ञात) यांच्याकडे अर्ज देण्यासाठी गेली असता, त्याने तिच्याशी अयोग्य वर्तन करत “तू मला खुश कर, मी तुला सुट्टी देतो आणि पगारही कापणार नाही,” असे म्हणत तिच्याशी अंगलगट करण्याचा प्रयत्न केला.
यावेळी संबंधित इन्चार्जने महिलेवर अत्याचार केल्याचा आरोप असून, त्या कृत्याचा व्हिडिओ मोबाईलमध्ये चित्रीत करून तो व्हायरल करण्याची धमकी दिली. तसेच पोलिसांत तक्रार केल्यास तिच्या कुटुंबीयांना जीवे मारण्याची धमकी दिल्याचेही फिर्यादीत नमूद करण्यात आले आहे. यानंतर २१ मार्च रोजी आरोपीने कंपनीत नव्याने रुजू झालेल्या मुलींना आपल्या कडे पाठवून त्याला “खुश” करण्यास सांगण्याचा दबाव संबंधित महिलेवर टाकला. मात्र, तिने यास ठाम नकार दिल्यानंतर २३ मार्च रोजी एका सहकारी महिलेला हाताशी धरून मोबाईलवरून तिच्याशी वाद घालण्यात आला.
सततच्या त्रासाला कंटाळून संबंधित महिलेने हा प्रकार आपल्या कुटुंबीयांना सांगितला. कुटुंबीयांनी धीर देत पोलिसांत तक्रार करण्याचा सल्ला दिल्यानंतर तिने पाळधी पोलीस ठाण्यात फिर्याद दाखल केली. या प्रकरणी पाळधी पोलिसांत गुन्हा दाखल करण्यात आला असून पुढील तपास पोलीस हेड कॉन्स्टेबल प्रवीण तांदळे करीत आहेत. या घटनेमुळे औद्योगिक क्षेत्रातील महिलांच्या सुरक्षिततेचा प्रश्न पुन्हा ऐरणीवर आला आहे.
