जळगाव मिरर | ५ एप्रिल २०२६
बुलढाणा जिल्ह्यातील राजकीय वातावरण पुन्हा एकदा तापले असून, चिखलीचे माजी आमदार आणि जिल्हा काँग्रेस कमिटीचे अध्यक्ष राहुल बोंद्रे यांच्या वादग्रस्त विधानामुळे नवा वाद निर्माण झाला आहे. आपल्या राजकीय निष्ठेबाबत बोलताना त्यांनी महिलांचा संदर्भ देत केलेल्या वक्तव्यामुळे संतापाची लाट उसळली असून, चिखली शहरात महिलांनी त्यांच्या प्रतिमेला ‘जोडे मारो’ आंदोलन करत निषेध नोंदवला.
गेल्या काही दिवसांपासून राहुल बोंद्रे हे शिवसेना (शिंदे गट) आमदार संजय गायकवाड यांच्या भेटीमुळे चर्चेत होते. गायकवाड यांनी बोंद्रे यांच्या निवासस्थानी भेट दिल्याने बोंद्रे शिवसेनेत प्रवेश करणार असल्याच्या चर्चा रंगल्या होत्या. या पार्श्वभूमीवर आयोजित पत्रकार परिषदेत बोंद्रे यांना पक्षप्रवेशाबाबत प्रश्न विचारण्यात आला. यावेळी उत्तर देताना बोंद्रे यांनी भाजपच्या रणनीतीवर टीका केली. मात्र, आपली काँग्रेसप्रती निष्ठा स्पष्ट करताना त्यांनी महिलांच्या ‘पतिव्रता’ संदर्भातील उदाहरण दिले. “जी कुणी महिला असते… तिला दाखवावं लागतं की ती किती पतिव्रता आहे. ती मोठं कुंकू लावते, मोठं मंगळसूत्र घालते,” असे विधान त्यांनी केले.
या विधानामुळे वाद निर्माण झाला असून, महिलांच्या वैयक्तिक श्रद्धा व सौभाग्यचिन्हांचा उल्लेख केल्याबद्दल त्यांच्यावर टीका होत आहे. “मला वारंवार काँग्रेसमध्ये असल्याचे सांगण्याची गरज नाही,” हे सांगण्याचा त्यांचा उद्देश असला, तरी त्यासाठी वापरलेले उदाहरण आक्षेपार्ह ठरल्याचे मत व्यक्त होत आहे. दरम्यान, या वक्तव्याचे पडसाद चिखली शहरात उमटले. संतप्त महिलांनी एकत्र येत बोंद्रे यांच्या प्रतिमेला जोडे मारत निषेध आंदोलन केले. या घटनेमुळे राजकीय वर्तुळात खळबळ उडाली असून, विविध स्तरांतून त्यांच्या वक्तव्याचा निषेध होत आहे. या प्रकरणामुळे जिल्ह्यातील राजकारण तापले असून, बोंद्रे यांच्याकडून स्पष्टीकरण किंवा दिलगिरी व्यक्त केली जाणार का, याकडे सर्वांचे लक्ष लागले आहे.
