जळगाव मिरर | १७ एप्रिल २०२६
शहरातील विमानतळ परिसरातील तारा बिझनेस पार्कमध्ये एका व्यावसायिकाच्या बंद घरावर अज्ञात चोरट्यांनी डल्ला मारत सुमारे २२ लाखांहून अधिक किमतीचा मुद्देमाल लंपास केल्याची खळबळजनक घटना उघडकीस आली आहे. या प्रकरणामुळे परिसरात भीतीचे वातावरण निर्माण झाले असून पोलिसांनी तपासाची चक्रे वेगाने फिरवली आहेत.
मिळालेल्या माहितीनुसार, कुसुंबा खुर्द (विमानतळ परिसर) येथे तारा बिझनेस पार्कमध्ये राहणारे मोईज अब्बास बोहरा (वय ४८) हे ‘रुबी पेंट’ या रंगाच्या व्यवसायाशी संबंधित आहेत. त्यांच्या घराच्या तळमजल्यावर फॅक्टरी असून वरच्या मजल्यावर ते कुटुंबासह वास्तव्यास आहेत. गेल्या दोन महिन्यांपासून घरात रंगकाम व फर्निचरचे काम सुरू होते. १० एप्रिल रोजी मोईज बोहरा हे दर्शनासाठी बऱ्हाणपूर येथील हकीमी दर्ग्याकडे रवाना झाले होते. त्यानंतर १३ एप्रिल रोजी त्यांनी कुटुंबीयांनाही तेथे बोलावून घेतले. संपूर्ण कुटुंब घराला कुलूप लावून बाहेर गेल्याची संधी साधत चोरट्यांनी आपला डाव साधला.
१५ एप्रिल रोजी पहाटे सुमारे २.१५ वाजता बोहरा कुटुंब घरी परतले असता, घराच्या वरच्या मजल्याचा दरवाजा अर्धवट उघडा असल्याचे त्यांच्या निदर्शनास आले. दरवाजाचे कुलूप तुटलेले पाहून चोरी झाल्याचा संशय बळावला. घरात प्रवेश केल्यावर हॉलमधील तीन गोदरेज कपाटांचे कुलूप तोडून सामान अस्ताव्यस्त टाकलेले दिसले. तपासणीदरम्यान चोरट्यांनी कपाटातील लॉकरमधून १० लाख १२ हजार रुपयांची रोकड, १० ग्रॅमचे सोन्याचे ब्रेसलेट, २१ ग्रॅमच्या पाच अंगठ्या, तसेच २८ ग्रॅम वजनाच्या सोन्या-चांदीच्या बांगड्या असा एकूण १२ लाख १३ हजार रुपयांचा ऐवज चोरल्याचे समोर आले. अशा प्रकारे एकूण मुद्देमालाची किंमत २२ लाख रुपयांहून अधिक असल्याचे स्पष्ट झाले आहे.
घटनेची माहिती मिळताच एमआयडीसी पोलिसांनी घटनास्थळी धाव घेत पंचनामा केला. घरात फर्निचरचे काम सुरू असल्याने तसेच फॅक्टरीत अनेक मजूर ये-जा करत असल्याने, कोणीतरी ओळखीच्या व्यक्तीने घरावर पाळत ठेवून हा गुन्हा केल्याचा संशय पोलिसांनी व्यक्त केला आहे.
याप्रकरणी मोईज बोहरा यांच्या फिर्यादीवरून एमआयडीसी पोलीस ठाण्यात अज्ञात चोरट्यांविरुद्ध गुन्हा दाखल करण्यात आला असून, पुढील तपास पोलीस उपनिरीक्षक राहुल तायडे करत आहेत. पोलिसांकडून सीसीटीव्ही फुटेज तपासले जात असून आरोपींचा शोध सुरू आहे.
