मुक्ताईनगर प्रतिनिधी | प्रणित काठोके
नवीन फौजदारी कायद्यांबाबत पत्रकारांना सखोल माहिती मिळावी आणि जबाबदार वार्तांकनाला चालना मिळावी या उद्देशाने श्रीकांत धिवरे सर (पोलीस अधीक्षक, जळगाव) यांच्या पुढाकारातून आयोजित विशेष मार्गदर्शन कार्यशाळा आज दि. ३ मे २०२६ रोजी मोठ्या उत्साहात पार पडली. या कार्यशाळेला जिल्ह्यातील विविध माध्यमांतील पत्रकारांची उत्स्फूर्त उपस्थिती लाभली.
कार्यशाळेत श्रीकांत धिवरे सर यांनी नवीन फौजदारी कायद्यांतील महत्त्वाचे बदल, त्यांचे परिणाम आणि पत्रकारांनी वार्तांकन करताना घ्यावयाची कायदेशीर व नैतिक काळजी याबाबत सविस्तर मार्गदर्शन केले. तसेच संदीप गावित सर यांनीही प्रत्यक्ष उदाहरणांच्या माध्यमातून विषय अधिक सोपा व समजण्यास सुलभ केला.
यावेळी उपस्थित पत्रकारांनी विविध शंका व प्रश्न मांडले. त्या सर्व प्रश्नांचे समाधानकारक निरसन अधीक्षकांनी संयमाने व सखोलपणे केले. त्यामुळे ही कार्यशाळा केवळ माहितीपर न राहता संवादात्मक ठरली. कार्यशाळा संपल्यानंतर उपस्थितांसाठी स्नेहभोजनाचा कार्यक्रमही आयोजित करण्यात आला होता. या स्नेहभोजनाच्या माध्यमातून पत्रकार व पोलीस प्रशासन यांच्यात अनौपचारिक संवाद साधला गेला, ज्यामुळे परस्पर संबंध अधिक दृढ होण्यास मदत झाली.
एकूणच, पत्रकारांच्या व्यावसायिक कौशल्यात भर घालणारी आणि पोलीस-प्रशासन व माध्यमांमधील समन्वय अधिक मजबूत करणारी ही कार्यशाळा ठरली. उपस्थित पत्रकारांनी या उपक्रमाचे मनापासून कौतुक केले.
