जळगाव मिरर | १२ सप्टेंबर २०२६
कविवर्य स्वर्गीय ना. धो. महानोर यांच्या स्मृतीप्रित्यर्थ आयोजित करण्यात आलेली आंतरशालेय मराठी कविता वाचन स्पर्धा दिनांक 12 सप्टेंबर 2026 रोजी उत्साहपूर्ण वातावरणात पार पडली.
या कार्यक्रमासाठी प्रमुख पाहुण्या म्हणून सौ. सुजाता देशपांडे उपस्थित होत्या. त्या एम.कॉम., डी.एच.ई. (डिप्लोमा इन हायर एज्युकेशन) असून, त्यांनी मूळजी जेठा कनिष्ठ महाविद्यालयात तब्बल 30 वर्षे प्राध्यापक म्हणून उल्लेखनीय सेवा बजावली आहे. तसेच श्री. सुबोध जयंत सराफ, जैन इरिगेशन, जळगाव Rotary क्लब डिस्ट्रिक्ट ऑफिसर. यांचीही विशेष उपस्थिती लाभली.
कार्यक्रमाच्या प्रारंभी मान्यवरांच्या हस्ते स्वर्गीय कविवर्य ना. धो. महानोर यांच्या प्रतिमेचे पूजन करून त्यांना भावपूर्ण अभिवादन करण्यात आले. याच प्रसंगी मराठी भाषा, तिचे व्याकरण आणि भाषेच्या शुद्धतेसाठी आपले संपूर्ण आयुष्य समर्पित करणाऱ्या मराठी व्याकरण गुरू स्वर्गीय प्रा. यास्मिन शेख यांच्या कार्याप्रती कृतज्ञता व्यक्त करण्यात आली. हा क्षण उपस्थितांसाठी अत्यंत भावपूर्ण व प्रेरणादायी ठरला.
स्पर्धेत विविध शाळांतील मराठी माध्यम व इंग्रजी माध्यमातील बालकवींनी अनेक नामांकित कवींच्या कविता प्रभावीपणे सादर केल्या. आपल्या ओजस्वी आवाजाने, स्पष्ट उच्चारांनी, योग्य भावाभिव्यक्तीने आणि प्रभावी सादरीकरणाने विद्यार्थ्यांनी व्यासपीठ अक्षरशः दणाणून सोडले. मराठी कवितेची समृद्धी आणि तिचे सौंदर्य बालकांच्या सादरीकरणातून उपस्थितांना अनुभवायला मिळाले.
प्रमुख पाहुण्या सौ. प्रा. सुजाता देशपांडे मॅडम व श्री. सुबोध सराफ यांनी विद्यार्थ्यांच्या कविता सादरीकरणातील उत्साहाचे व आत्मविश्वासाचे भरभरून कौतुक केले. अशा उपक्रमांमुळे विद्यार्थ्यांमध्ये मराठी भाषेची आवड निर्माण होऊन कविता, साहित्य आणि संस्कृतीबद्दलची जाणीव अधिक दृढ होते, असे त्यांनी आपल्या मनोगतात सांगितले.
कार्यक्रमामुळे कविवर्य ना. धो. महानोर यांच्या साहित्यिक कार्याला अभिवादन करण्याबरोबरच मराठी भाषा, कविता आणि व्याकरणाच्या समृद्ध परंपरेचा गौरवपूर्ण जागर घडून आला. विद्यार्थ्यांच्या उत्स्फूर्त सहभागामुळे हा आंतरशालेय कविता वाचन स्पर्धेचा कार्यक्रम अत्यंत उत्साहपूर्ण आणि संस्मरणीय ठरला.
