जळगाव मिरर | ६ मे २०२६
एरंडोल तालुक्यातील ताडे येथे हळदी समारंभाच्या कार्यक्रमात गावठी कट्टा बाळगणाऱ्या युवकाला कासोदा पोलिसांनी अटक करत मोठी कारवाई केली आहे. या घटनेमुळे परिसरात एकच खळबळ उडाली आहे.
मिळालेल्या माहितीनुसार, दि. ०३ मे २०२६ रोजी ताडे येथे हळदी समारंभाचा कार्यक्रम आयोजित करण्यात आला होता. या कार्यक्रमासाठी बाहेरगावाहूनही अनेक पाहुणे उपस्थित होते. त्यामध्ये लखन प्रकाश वाघ (रा. परधाडे, ता. पाचोरा) हा युवक देखील उपस्थित होता. रात्री सुमारे ११:३० वाजण्याच्या सुमारास बँडवर नाचताना काही नागरिकांच्या निदर्शनास आले की, संबंधित युवकाच्या कमरेला गावठी कट्टा (अग्निशस्त्र) लावलेला आहे. उपस्थित नागरिकांनी याबाबत त्याला विचारणा केली असता, त्याने गर्दीचा फायदा घेत घटनास्थळावरून पळ काढला. यानंतर या गंभीर प्रकाराची माहिती तात्काळ कासोदा पोलीस स्टेशनला देण्यात आली. पोलिसांनी लगेचच आरोपीचा शोध सुरू केला.
दरम्यान, गुप्त बातमीदारामार्फत पोलिसांना माहिती मिळाली की, सदर युवक पुन्हा ताडे गावात संशयास्पद हालचाली करत असून त्याच्याकडे पुन्हा गावठी कट्टा आहे. या माहितीची खातरजमा करून पोलिसांनी सापळा रचला. पोलीस उपनिरीक्षक धर्मराज पाटील, पोलीस कर्मचारी निलेश गायकवाड, योगेश पाटील व सोनू पाचुंदे यांच्या पथकाने भातखेडे चौफुली येथे कारवाई करत लखन प्रकाश वाघ याला ताब्यात घेतले. त्याची अंगझडती घेतली असता त्याच्याकडून एक गावठी कट्टा व एक जिवंत काडतूस जप्त करण्यात आले. आरोपीला पुढील कायदेशीर कारवाईसाठी कासोदा पोलीस स्टेशन येथे आणण्यात आले असून त्याच्याविरुद्ध अवैध शस्त्र बाळगल्याप्रकरणी गुन्हा दाखल करण्यात आला आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक कविता नेरकर तसेच उपविभागीय पोलीस अधिकारी विजयकुमार ठाकुरवाड यांच्या मार्गदर्शनाखाली कासोदा पोलीस स्टेशनचे प्रभारी श्रीकांत पाटील यांच्या नेतृत्वात करण्यात आली. संबंधित पथकाने केलेल्या या धाडसी कारवाईचे सर्वत्र कौतुक होत आहे.
