जळगाव मिरर | ७ मे २०२६
विद्येचे माहेरघर म्हणून ओळखल्या जाणाऱ्या पुण्यात पुन्हा एकदा नात्यातील क्रौर्याची धक्कादायक घटना समोर आली आहे. चंदननगर परिसरातील पठारे वस्तीमध्ये एका माथेफिरू प्रियकराने आपल्या प्रेयसीवर घरात घुसून प्राणघातक हल्ला केल्याने परिसरात खळबळ उडाली आहे. लग्नाचे बोलणे दुसरीकडे सुरू असल्याच्या रागातून आरोपीने हा रक्तरंजित हल्ला केल्याचे प्राथमिक तपासात समोर आले आहे. गंभीर जखमी झालेल्या तरुणीवर सध्या खासगी रुग्णालयातील अतिदक्षता विभागात उपचार सुरू असून तिची प्रकृती चिंताजनक असल्याची माहिती पोलिसांनी दिली आहे.
मिळालेल्या माहितीनुसार, आरोपी दिलीप राठोड (वय २२) आणि पीडित तरुणी हे दोघेही एका खासगी मॉलमध्ये काम करत होते. कामाच्या ठिकाणी झालेली ओळख पुढे प्रेमसंबंधात बदलली. मात्र, काही दिवसांपासून तरुणीचे लग्न दुसरीकडे ठरत असल्याचे आरोपीला समजले होते. याच कारणावरून तो संतप्त झाला होता. घटनेच्या दिवशी तरुणी घरात एकटी असल्याची माहिती मिळताच दिलीप राठोड तिच्या घरी पोहोचला. सुरुवातीला दोघांमध्ये जोरदार वाद झाला. शब्दाला शब्द वाढत गेल्यानंतर संतापाच्या भरात आरोपीने ब्लेडसारख्या धारदार वस्तूने तरुणीच्या गळ्यावर सपासप वार केले. गंभीर जखमी झालेली तरुणी रक्ताच्या थारोळ्यात कोसळली.
विशेष म्हणजे, मृत्यूच्या दाढेत असतानाही या तरुणीने मोठे धैर्य दाखवले. गळ्यावर गंभीर जखम झाल्याने तिला व्यवस्थित बोलताही येत नव्हते. अशा अवस्थेत तिने आपल्या भावाला फोन लावला. “दादा, मला एका मुलाने मारलंय… गळ्यातून आवाज येत नाहीये… तू लवकर घरी ये,” असे ती थरथरत्या आवाजात म्हणाली. त्यानंतर तिने भावाला व्हिडीओ कॉल केला. समोर बहिणीला रक्तबंबाळ अवस्थेत पाहून भावालाही धक्का बसला. त्याने तातडीने घटनास्थळी धाव घेत तिला रुग्णालयात दाखल केले.
दरम्यान, पोलिसांनी आणि डॉक्टरांनी हल्लेखोराबाबत विचारणा केली असता, जखमेमुळे तरुणीला बोलणे शक्य नव्हते. तिने खुणेने कागद आणि पेन मागितले व थरथरत्या हाताने “दिलीप राठोड” असे आरोपीचे नाव लिहून दिले. या महत्त्वपूर्ण माहितीच्या आधारे पोलिसांनी तातडीने तपास सुरू केला. घटनेची माहिती मिळताच चंदननगर पोलिसांनी आरोपी दिलीप राठोडला अटक केली आहे. त्याच्याविरोधात खुनाचा प्रयत्न, घरात घुसून हल्ला करणे यांसह विविध गंभीर कलमांखाली गुन्हा दाखल करण्यात आला आहे. पोलिस सध्या या प्रकरणाचा अधिक तपास करत आहेत.
