जळगाव मिरर | 15 मे 2026
जिल्ह्यात अवैधरित्या घातक शस्त्रे व अग्नीशस्त्रे बाळगणाऱ्या इसमांविरुद्ध कठोर कारवाई करण्याच्या सूचना पोलीस अधीक्षक श्रीकांत धिवरे यांनी दिल्यानंतर धरणगाव पोलिसांनी मोठी कारवाई करत एका संशयित इसमाकडून गावठी बनावटीची मॅगझीनसह पिस्टल जप्त केली आहे. या प्रकरणी आव्हाणे ता. जळगाव येथील आनंदा बळीराम सपकाळे (वय ३९) याच्याविरुद्ध धरणगाव पोलीस स्टेशनला भारतीय हत्यार कायदा कलम ३/२५ अन्वये गुन्हा दाखल करण्यात आला आहे.
पोलीस सूत्रांकडून मिळालेल्या माहितीनुसार, पोलीस अधीक्षक श्रीकांत धिवरे यांनी जिल्ह्यातील सर्व पोलीस स्टेशन प्रभारी अधिकाऱ्यांना अवैध शस्त्र बाळगणाऱ्यांविरुद्ध गोपनीय माहिती काढून कारवाई करण्याच्या सूचना दिल्या होत्या. त्यानुसार धरणगाव पोलीस स्टेशनचे प्रभारी अधिकारी सुनिल पवार यांनी आपल्या अधिपत्याखालील अधिकारी व अंमलदारांना विशेष सूचना दिल्या होत्या.
दरम्यान, दि. १४ मे २०२६ रोजी दुपारी सुमारे अडीच वाजेच्या सुमारास पाळधी पोलीस दूरक्षेत्राचे सहायक पोलीस निरीक्षक भूषण कोते हे आपल्या पथकासह दोनगाव ता. धरणगाव येथील गिरणा नदीपात्रात अवैध रेती वाहतुकीस प्रतिबंध करण्यासाठी पेट्रोलिंग करत होते. यावेळी नदीपात्रात एक इसम संशयास्पद हालचाली करताना आढळून आला.
सदर इसमाची चौकशी केली असता त्याच्याकडून समाधानकारक उत्तरे मिळाली नाहीत. त्यामुळे पोलिसांनी त्याची अंगझडती घेतली असता त्याच्या ताब्यातून २५ हजार रुपये किमतीची गावठी बनावटीची मॅगझीनसह एक पिस्टल आढळून आली. पोलिसांनी तत्काळ पिस्टल जप्त करून आरोपीला ताब्यात घेतले. या प्रकरणी धरणगाव पोलीस स्टेशन येथे गुन्हा रजिस्टर क्रमांक १८७/२०२६ दाखल करण्यात आला असून पुढील तपास पोलीस उपनिरीक्षक दत्तात्रय बडगुजर हे करत आहेत.
ही कारवाई पोलीस अधीक्षक श्रीकांत धिवरे, अपर पोलीस अधीक्षक कविता नेरकर तसेच उपविभागीय पोलीस अधिकारी आण्णासाहेब घोलप यांच्या मार्गदर्शनाखाली करण्यात आली. पोलीस निरीक्षक सुनिल पवार यांच्या नेतृत्वाखाली सहायक पोलीस निरीक्षक भूषण कोते, पोलीस उपनिरीक्षक दत्तात्रय बडगुजर, पोलीस कॉन्स्टेबल ज्ञानेश्वर बाविस्कर, रविंद्र चौधरी व विशाल पाटील यांच्या पथकाने ही उल्लेखनीय कारवाई केली.
