जळगाव मिरर | १८ मे २०२६
लग्न समारंभ आटोपून गावी परतत असताना झालेल्या भीषण अपघातात जखमी झालेले गोदावरी नर्सिंग महाविद्यालयाचे रजिस्ट्रार प्रवीण कोल्हे (वय ४८, रा. रोझोदा, ह.मु. जळगाव) यांचा उपचारादरम्यान दुर्दैवी मृत्यू झाला. या अपघातात त्यांच्या कुटुंबातील अन्य चार जण जखमी झाले असून त्यांच्यावर उपचार सुरू आहेत. या घटनेमुळे परिसरात हळहळ व्यक्त होत आहे.
हा अपघात १४ मे रोजी मध्यरात्री सुमारे १:३० वाजेच्या सुमारास पिंपरूड फाट्याजवळ घडला. प्रवीण कोल्हे हे १३ मे रोजी आपल्या कुटुंबीयांसह भुसावळ येथे चुलत भावाच्या लग्नासाठी गेले होते. लग्न समारंभ आटोपल्यानंतर ते आपल्या मूळगावी रोझोदा येथे कारने (क्र. एमएच. १९, सीव्ही. ०६२४) परतत होते. दरम्यान, पिंपरूड फाट्याजवळ आल्यानंतर चालकाचा वाहनावरील ताबा सुटल्याने कार रस्त्याच्या कडेला असलेल्या झाडावर जोरात आदळली. अपघात इतका भीषण होता की कारचा पुढील भाग मोठ्या प्रमाणात चेंदामेंदा झाला.
या अपघातात प्रवीण कोल्हे यांच्यासह त्यांची आई उषा प्रल्हाद कोल्हे (६९), पत्नी हर्षा कोल्हे (३८), मुलगी निर्मिती कोल्हे (१०) तसेच वहिनी भावना नीलेश कोल्हे (४१) हे जखमी झाले. अपघातानंतर स्थानिक नागरिकांनी मदतकार्य करत सर्व जखमींना तातडीने जळगाव येथील डॉ. उल्हास पाटील रुग्णालयात दाखल केले.
प्रवीण कोल्हे यांची प्रकृती गंभीर असल्याने त्यांच्यावर अतिदक्षता विभागात उपचार सुरू होते. मात्र उपचारादरम्यान १५ मे रोजी त्यांची प्राणज्योत मालवली. त्यांच्या निधनामुळे शैक्षणिक, सामाजिक व वैद्यकीय क्षेत्रातून शोक व्यक्त केला जात आहे.
