जळगाव मिरर | २६ मे २०२६
भुसावळ शहरातील एका १७वर्षीय अल्पवयीन मुलीचा विनयभंग करून सोशल मीडियावर बदनामी केल्याप्रकरणी जळगाव येथील एका तरुणाविरोधात भुसावळ शहर पोलिस ठाण्यात गुन्हा दाखल करण्यात आला आहे. सागर किरण पाटील (वय २२, रा. कुसुंबा, जळगाव) असे संशयिताचे नाव आहे.
पोलिसांनी दिलेल्या माहितीनुसार, पीडित मुलगी आणि संशयित सागर पाटील यांच्यात जानेवारी २०२३ पासून ओळख होती. पुढे त्यांच्यात मैत्री झाली. मात्र, मैत्रीचा गैरफायदा घेत सागरने जानेवारी २०२५ मध्ये मुलीकडे लग्न व शारीरिक संबंधांची मागणी केली. पीडितेने त्यास नकार दिल्यानंतर सागरने तिचा मानसिक छळ सुरू केल्याचा आरोप करण्यात आला आहे.
मुलगी अल्पवयीन असल्याची माहिती असूनही सागर तिचा क्लासला जाताना व घराबाहेर पडल्यावर सतत पाठलाग करत होता. सार्वजनिक ठिकाणी तिचा पाठलाग करून तिच्या मनात भीती आणि लज्जा निर्माण होईल, असे कृत्य करत होता. याशिवाय सागरने पीडितेच्या नावाने इन्स्टाग्रामवर बनावट अकाऊंट तयार करून त्यावर तिचे व स्वतःचे फोटो पोस्ट करत बदनामी केली. तसेच, या प्रकाराची कुठेही वाच्यता केल्यास कुटुंबाला इजा पोहोचवण्याची धमकी दिल्याचे तक्रारीत नमूद करण्यात आले आहे. सततच्या मानसिक त्रासाला कंटाळून पीडित मुलीने भुसावळ शहर पोलिस ठाण्यात तक्रार दिल्यानुसार सागर पाटील विरोधात गुन्हा दाखल करण्यात आला आहे. तपास पो.नि. उद्धव डमाळे यांच्या मार्गदर्शनात एपीआय राहुल भंडारे करत आहेत.
