जळगाव मिरर | २७ मे २०२६
शहरातील शिवाजीनगर हुडको भागात सज्जनगड बिल्डिगच्या आडोशाला सुरू असलेल्या गावठी हातभट्टीच्या दारू अड्ड्यावर जळगाव उपविभागीय पोलीस अधिकारी यांच्या पथकाने आणि शहर पोलिसांनी सोमवार दि. २५ रोजी सायंकाळी धडक कारवाई केली. या छाप्यात विनापरवाना गावठी दारूची विक्री करणाऱ्या एका २५ वर्षीय तरुणाला रंगेहाथ पकडण्यात आले असून, त्याच्या ताब्यातील ३० लिटर दारू जागीच नष्ट करण्यात आली असून विवेक विजय ढाके (वय २५, रा. घर नंबर २४, सिंधुदुर्गगड, शिवाजीनगर हुडको, जळगाव) याला अटक केली आहे.
मिळालेल्या माहितीनुसार, जळगाव विभागाचे उपविभागीय पोलीस अधिकारी नितीन गणापुरे यांना बातमीदारामार्फत माहिती मिळाली होती की, शहरातील शिवाजीनगर हुडको भागात सज्जनगड बिल्डिगच्या मागे मोकळ्या जागेत एक तरुण गावठी दारूची बेकायदा विक्री करत आहे. या माहितीच्या आधारे त्यांनी त्यांच्या पथकाला व शहर पोलीस ठाण्याला कारवाईचे आदेश दिले. त्यानुसार शहर पोलीस ठाण्याचे पोलीस निरीक्षक सागर शिंपी यांच्या मार्गदर्शनाखाली गुन्हे शोध पथकाचे सहाय्यक फौजदार दीपक शिरसाठ, स. फौ. सुनील पाटील, पो. है. कॉ. वीरेंद्र शिंदे, पो. कॉ. अमोल ठाकूर, प्रणय पवार तसेच डीवायएसपी कार्यालयाचे पो. कॉ. सचिन साळुंखे आणि आवेश शेख यांच्या पथकाने पंचांना सोबत घेऊन सापळा रचला.
सायंकाळी ५ वाजेच्या सुमारास पोलिसांनी सदर ठिकाणी अचानक छापा टाकला असता, आरोपी विवेक ढाके हा एका ३५ लिटर मापाच्या प्लास्टिकच्या कॅनसह बसलेला आढळून आला. पोलिसांनी कॅनची तपासणी केली असता त्यात उग्र आणि आंबट वासाची ३० लिटर गावठी हातभट्टीची दारू आढळून आली. तसेच त्यानंतर उर्वरित गावठी दारू पंचांसमक्ष जागीच ओतून नष्ट करण्यात आली.
या प्रकरणी डीवायएसपी कार्यालयाचे पोलीस कॉन्स्टेबल सचिन सुरेश साळुंखे यांच्या फिर्यादीवरून संशयित विवेक ढाके याच्याविरुद्ध जळगाव शहर पोलीस ठाण्यात महाराष्ट्र दारूबंदी कायदा कलम ६५ (ई) अन्वये गुन्हा दाखल करण्यात आला आहे. भरवस्तीत पोलिसांनी केलेल्या या कारवाईमुळे अवैध दारू विक्रेत्यांचे धाबे दणाणले आहेत.
