जळगाव मिरर | २९ मे २०२६
गेल्या काही दिवसापासून जळगाव जिल्ह्यात अनेक ठिकाणाहून अवैध वाळू चोरी सुरू असल्याच्या घटना वाढत असताना आता जळगाव जिल्हा पोलीस अधीक्षक श्रीकांत धिवरे यांनी जिल्ह्यातील वाळू चोरांविरोधात मोठी मोहीम सुरू केली आहे.
जळगाव जिल्ह्यातील अनेक गावांना गिरणा नदी पात्र लागून आहे या गिरणा नदी पात्रातून मोठ्या प्रमाणात अवैध वाळू उत्खनन होऊन त्याची जिल्ह्यासह परजिल्ह्यात विक्री होत आहे. तर दुसरीकडे महामार्ग असो की छोट्या-मोठ्या रस्त्यावरून हे वाळू चोर भरधाव वेगाने वाहन चालवीत असल्याने अपघाताची देखील मालिका मागील काही दिवसात सुरू होती त्याच अनुषंगाने जळगाव जिल्हा पोलीस अधीक्षक श्रीकांत धिवरे यांनी आता जिल्ह्यातील वाळूमाफियांकडे लक्ष करत त्यांच्यावर कारवाईचा बडगा उचलला आहे.
पहिल्याच दिवशी पाच कारवाई
दिनांक 28 मे रोजी पोलीस अधीक्षक श्रीकांत धिवरे यांच्या मार्गदर्शनाखाली एकूण पाच गुन्हे दाखल करण्यात आले आहे. यात जळगाव पाचोरा रोडवरील रामदेव वाडी येथे एक डंपर जप्त करत गुन्हा दाखल केला आहे तर दुसऱ्या याच्यात धरणगाव पोलीस स्थानकाच्या हद्दीत असलेल्या सतखेडा फाट्याजवळ दीड ब्रास वाळूचे ट्रॅक्टर जप्त करत चालकावर गुन्हा दाखल केला आहे. तिसऱ्या कारवाई मध्ये एरंडोल पोलीस स्थानकच्या हद्दीत असलेल्या खडके ते खर्ची रोडवर नीट ब्रास वाळूचे ट्रॅक्टर जप्त करत मालकावर व चालकावर गुन्हा दाखल करण्यात आला आहे.
चौथ्या कारवाईत पाचोरा तालुक्यातील पिंपळगाव हरेश्वर पोलीस स्थानकाच्या हद्दीतील मोजे गावाच्या जवळ एका डंपर वर कारवाई करीत चालकावर गुन्हा दाखल करण्यात आला आहे. तर पाचवी कारवाई जळगाव तालुका पोलीस स्थानकाच्या हद्दीतील कानळदा गावाच्या लगत एक ब्रास वाळूच्या ट्रॅक्टरवर कारवाई करत गुन्हा दाखल करण्यात आला आहे. या कारवाईमुळे जिल्ह्यातील वाळू माफियांमध्ये खळबळ उडाली आहे.
