जळगाव मिरर | ३१ मे २०२६
शहरातील आयएमआर कॉलेज समोर दि. २९ मे रोजी दुपारी दीड वाजता गाडी बाजूला घेण्यास सांगितल्याचा राग आल्याने नागेश अण्णाप्पा खेडगी (वय ४६, रा. वासुदेव पार्क) यांच्या डोक्यात कडक वस्तू मारुन गंभीर जखमी केले. याप्रकरणी जिल्हापेठ पोलिसात गुन्हा दाखल करण्यात आला आहे.
शहरातील कोल्हे नगराच्या पाठीमागील बाजूस असलेल्या वासुदेव पार्कमध्ये नागेश खेडगी हे वास्तव्यास असून ते खासगी नोकरी करतात. दि. २९ मे रोजी ते शहरातील आयएमआर कॉलेजजवळील सेंट्रल बँक ऑफ इंडियाजवळ गेले होते. यावेळी त्यांनी संशयितांना गाडी बाजूस घेण्यास सांगितले. त्याचा राग आल्याने दोघ अनोळखी इसमांनी त्यांना शिवीगाळ करीत मारहाण केली. या मारहाणीत त्यांनी काहीतरी कडक वस्तू खेडगी यांच्या डोक्यात मारुन गंभीर जखमी केले. जखमी खेडगी यांनी रुग्णालयात उपचार घेतल्यानंतर जिल्हापेठ पोलीस ठाण्यात तक्रार दिली. त्यानुसार दोघांविरुद्ध गुन्हा दाखल करण्यात आला आहे. तपास पोना सुवर्णा तायडे या करीत आहे.
