जळगाव मिरर | २ जुन २०२६
जिल्हा पोलिस दलातील पोलिस अंमलदारांची बदली प्रक्रिया गेल्याच आठवड्यात पार पडली. मात्र, नेहमीच्या सवयीनुसार बदलीची प्रक्रिया पूर्ण झाल्यानंतरही मर्जीतील किंवा सोयीचे ठिकाण मिळवण्यासाठी अनेकांकडून जोरदार ‘फिल्डिंग’ लावली जात असल्याचे समोर आले आहे. या पार्श्वभूमीवर, पोलिस अधीक्षक श्रीकांत धिवरे यांनी अशा ‘फिल्डिंग’ बहाद्दरांना झटका दिला आहे. आता बदल्यांसाठी कोणत्याही प्रकारची भेट चालणार नसल्याचे स्पष्ट करत, एसपींनी आपल्या कार्यालयाबाहेर थेट तसे आदेशच फलकावर लावले आहेत.
१ जून रोजी याबाबतचे आदेश कार्यालयाबाहेर लावले आहेत. गेल्या आठवड्यात जळगाव जिल्हा पोलिस दलातील अंमलदारांच्या बदल्यांची कायदेशीर प्रक्रिया पूर्ण झाली. नियमानुसार या बदल्या करण्यात आल्या असल्या, तरी अनेक कर्मचाऱ्यांना आपल्या पसंतीचे ठाणे किंवा विभाग हवा असल्याने त्यांनी अंतर्गत हालचाली सुरू केल्या होत्या.
काही जणांकडून थेट पोलिस अधीक्षकांना भेटून किंवा इतर माध्यमातून दबाव आणून बदली बदलून घेण्याचे प्रयत्न सुरू झाले होते. शेवटी पोलिस अधीक्षक श्रीकांत धिवरे यांनी थेट आदेश काढत, अनेकांकडून लावण्यात येणारी बदल्यांची ‘फिल्डिंग’च फ्लॉप केली आहे.
बदलीसाठी होणारी गर्दी आणि वशिलेबाजी रोखण्यासाठी पोलिस अधीक्षकांच्या कार्यालयाबाहेर जाहीर फलक लावण्यात आला आहे. या आदेशात स्पष्टपणे म्हटले आहे की, ‘सर्वसाधारण बदल्या, २०२६ व विनंती बदली संदर्भातील कामकाज पूर्ण झाले आहे. तरी, पोलिस अंमलदार यांनी बदल्यांसंदर्भात पोलिस अधीक्षक यांना भेटू नये.. जिल्हा पोलिस अधीक्षकांच्या या भूमिकेमुळे बदली प्रक्रिया रद्द करून घेण्यासाठी किंवा सोयीची जागा मिळवण्यासाठी प्रयत्न करणाऱ्या कर्मचाऱ्यांचे धाबे दणाणले आहे.
