जळगाव मिरर | १२ जून २०२६
मध्यरात्री हॉटेल बंद करुन आणि रस्त्याने जाणाऱ्या चार जणांना चाकूचा धाक दाखवून त्यांना मारहाण करण्यात आली. तसेच त्यांच्या वाहनाची तोडफोड करुन त्यांच्याजवळ असलेली ७हजार ८०० रुपयांची रोकड जबरदस्तीने हिसकावून नेल्याची घटना दि. ११ जून रोजी पहाटे महामार्गावर घडली. घटनेचे गांभीर्य लक्षात घेत तालुका पोलिसांनी तपासचक्रे फिरवित पोलिसांच्या रेकॉर्डवरील सराईत गुन्हेगार चेतन उर्फ बटाटा रमेश सुशिर (वय २१), उमाकांत दत्तात्रय जाधव (वय, दोघ रा. संत मिराबाईनगर), गौरव संजय जाधव (वय २१, रा. साईनगर) व रोशन भगवान पाटील (वय २६, रा. पांडुरंग नगर) यांना दोन तासात अटक केली आहे.
मिळालेल्या माहितीनुसार, बांभोरी येथे हॉटेलवरील मॅनेजर असलेले चेतन प्रकाश पाटील हे दि. १० जून रोजी मध्यरात्री १ वाजता हॉटेल बंद करुन (एमएच १९, डीजे ०८७०) दुचाकीने घरी जात होते. महामार्गावरील हॉटेल साई गार्डन समोर ते लघुशंका करण्यासाठी थांबले. यावेळी पाळधीकडून भरधाव वेगाने येणाऱ्या कारसह दोन दुचाकीस्वारी त्यांच्याजवळ थांबले. त्यातील एकाने चेतन पाटील यांच्या पोटाला चाकू लावून मारहाण केली. तसेच त्यांच्या खिशातील ४ हजार ८०० रुपयांची रोकड त्यांनी जबरदस्तीने हिसकावून घेतली. घाबरलेल्या चेतन पाटील यांनी संशयितांच्या तावडीतून सुटका करुन घेत ते एका ठिकाणी लपून बसले. त्यानंतर संशयित हे त्यांची वाहने घेवून तेथून पसार झाले. मध्यरात्री चेतन पाटील यांनी पोलिस ठाण्यात जावून घडलेली घटना कथन केली.
परंतु ते घाबरलेल्या अवस्थेत असल्यामुळे ते रात्री तक्रार न देता दुसऱ्या दिवशी सकाळी तक्रार देण्याकरीता पोलिसात गेले. दरम्यान मध्यरात्री साडेतीन ते चार वाजेच्या सुमारास किशोर लक्ष्मण कोळी (रा. बांभोरी, ता. जळगाव), भूषण पंडीत महाजन (रा. श्रीराम कॉलनी) व परेश अशोक अमृतकर (बांभोरी, ता. धरणगाव, ह.मु. साईनगर) यांना देखील चाकूचा धाक दाखवून त्यांच्याजवळील रोकड जबरीने हिसकावून नेली. याप्रकरणी तालुका पोलिसात गुन्हा दाखल करण्यात आला आहे. तसेच पोलिसांनी संशयित चेतन उर्फ बटाटा सुशिर, उमाकांत जाधव, गौरव जाधव व रोशन पाटील यांना अटक केली आहे.
यांनी केली कारवाई
सदरची यशस्वी कामगिरी पोलीस अधीक्षक श्री. श्रीकांत धीवरे सर, मा. अप्पर पोलीस अधीक्षक सो श्री. संदीप गावीत साहेब, मा. उपविभागीय पोलीस अधिकारी श्री. नितीन गणापुरे साहेब व जळगाव तालुका पोलीस स्टेशनचे पोलीस निरीक्षक शशिकांत पाटील यांच्या मार्गदर्शनाखाली डीबी पथकाचे सफौ- सुनिल पाटील, पोलीस हवालदार योगेश पाटील, पोलीस हवालदार अविनाश देवरे, कैलास इंगळे, पोलीस कॉस्टेबल प्रविण कोळी, दीपक देवरे, किरण पाटील आणि वाहन चालक पोहेका पंकज देशमुख यांनी केली असून गुन्ह्याचा पुढील तपास ग्रेड पोलीस उपनिरीक्षक शामकुमार मोरे हे करीत आहेत.
