जळगाव मिरर | १९ जून २०२६
राष्ट्रीयकृत बँकेतून कोणतीही फी न घेता तब्बल १० कोटी रुपयांचे कर्ज मंजूर करून देण्याचे आमिष दाखवत प्रोसेसिंग फीच्या नावाखाली ५ लाख रुपये उकळल्याप्रकरणी चाळीसगावातील एका व्यापाऱ्याची फसवणूक झाल्याची घटना उघडकीस आली आहे. याप्रकरणी नाशिक येथील एका व्यक्तीविरुद्ध चाळीसगाव शहर पोलीस ठाण्यात फसवणुकीचा गुन्हा दाखल करण्यात आला आहे.
पोलिसांनी दिलेल्या माहितीनुसार, चाळीसगाव शहरातील शास्त्री नगर परिसरात राहणारे गोविंद हिरालाल चौधरी यांचा चायनिज खाद्यपदार्थांचा व्यवसाय आहे. व्यवसायाचा विस्तार करण्यासाठी त्यांनी मोठ्या कर्जाचा पर्याय शोधण्यास सुरुवात केली होती. याच काळात त्यांची ओळख नाशिक येथील शांताराम मार्तंड संदान पाटील (रा. सह्याद्री अपार्टमेंट, मखमलाबाद, नाशिक) याच्याशी झाली.
शांताराम पाटील याने गोविंद चौधरी यांना राष्ट्रीयकृत बँकेतून कोणत्याही प्रकारची फी न घेता १० कोटी रुपयांचे कर्ज मंजूर करून देण्याचे आश्वासन दिले. त्यासाठी आवश्यक कागदपत्रे जमा करण्यास सांगितले. कर्ज मंजुरीची प्रक्रिया सुरू असल्याचे भासवून त्याने चौधरी यांचा विश्वास संपादन केला.
यानंतर पाटील याने कर्ज प्रक्रियेसाठी ‘प्रोसेसिंग फी’ म्हणून ५ लाख रुपये जमा करणे आवश्यक असल्याचे सांगितले. व्यवसायासाठी मोठ्या कर्जाची गरज असल्याने आणि कर्ज मंजूर होईल या विश्वासातून गोविंद चौधरी यांनी पत्नीचे दागिने विकून १५ फेब्रुवारी २०२५ रोजी संबंधित रक्कम शांताराम पाटील यांच्या बँक खात्यात जमा केली.
मात्र, पैसे जमा करूनही बराच कालावधी उलटल्यानंतर कर्ज मंजूर झाले नाही. त्यामुळे चौधरी यांनी संबंधित व्यक्तीकडे वारंवार संपर्क साधून कर्जाबाबत विचारणा केली. कर्ज मिळण्याची शक्यता नसल्याचे लक्षात आल्यानंतर त्यांनी भरलेले ५ लाख रुपये परत देण्याची मागणी केली. यावेळी शांताराम पाटील याने ‘आज देतो, उद्या देतो’ असे सांगून वेळकाढूपणा केला. इतकेच नव्हे तर, “तुमच्याकडून जे होईल ते करून घ्या,” अशी धमकीही दिल्याचा आरोप फिर्यादीने केला आहे.
दरम्यान, गोविंद चौधरी व त्यांच्या काही मित्रांनी नाशिक येथे जाऊन शांताराम पाटील यांची प्रत्यक्ष भेट घेतली. त्या वेळी आठ दिवसांत संपूर्ण रक्कम परत करण्याचे आश्वासन देण्यात आले. मात्र त्यानंतरही पैसे परत मिळाले नाहीत. अखेर आपली फसवणूक झाल्याचे स्पष्ट झाल्यानंतर गोविंद चौधरी यांनी चाळीसगाव शहर पोलीस ठाण्यात तक्रार दाखल केली. त्यांच्या फिर्यादीवरून शांताराम मार्तंड संदान पाटील याच्याविरुद्ध फसवणुकीचा गुन्हा दाखल करण्यात आला असून पोलीस पुढील तपास करीत आहेत.
