जळगाव मिरर | २४ जून २०२६
अजिंठा रोडवरील तोलकाट्याजवळ असलेल्या स्टेट बँक ऑफ इंडियाच्या एटीएममध्ये गॅस कटरच्या सहाय्याने रोकड चोरी करण्याचा प्रयत्न पोलिसांच्या तत्परतेमुळे हाणून पाडण्यात आला. बँकेच्या सुरक्षा यंत्रणेला एटीएम मशीनमध्ये छेडछाड होत असल्याचा अलर्ट मिळाल्यानंतर पोलिसांनी तातडीने घटनास्थळी धाव घेतली. पोलिस येत असल्याची चाहूल लागताच चोरट्यांनी घटनास्थळावरून पळ काढला. ही घटना मंगळवारी पहाटे सुमारे ५ वाजेच्या सुमारास घडली.
मिळालेल्या माहितीनुसार, अजिंठा रस्त्यावरील तोलकाट्याजवळ स्टेट बँक ऑफ इंडियाचे एटीएम केंद्र आहे. पहाटेच्या वेळी काही अज्ञात चोरट्यांनी गॅस कटरच्या सहाय्याने एटीएम मशीन कापण्यास सुरुवात केली. मशीनमध्ये सुरू असलेल्या छेडछाडीची माहिती तत्काळ बँकेच्या सुरक्षा यंत्रणेला मिळाली. त्यानंतर बँक व्यवस्थापनाकडून एमआयडीसी पोलिस ठाण्याशी संपर्क साधण्यात आला.
या घटनेची माहिती मिळताच ठाणे अंमलदार चंद्रकांत पाटील यांनी वरिष्ठ अधिकाऱ्यांना माहिती देत पोलिस पथक घटनास्थळी रवाना केले. उपविभागीय पोलिस अधिकारी नितीन गणापुरे, पोलिस निरीक्षक बबन आव्हाड यांच्यासह पोहेकॉ. प्रदीप पाटील, रामकृष्ण पाटील, रमेश चौधरी आणि किरण चौधरी यांनी तातडीने घटनास्थळी धाव घेतली.
दरम्यान, चोरट्यांनी एटीएमचे पुढील शटर उघडून मशीनच्या बाजूचा भाग कापण्यास सुरुवात केली होती. मशीनचा एक भाग कापण्यातही त्यांना यश आले होते. मात्र पोलिस येत असल्याचे लक्षात येताच त्यांनी आपला बेत अर्धवट सोडून घटनास्थळावरून पलायन केले. घाईगडबडीत त्यांनी वापरलेला गॅस कटर तेथेच टाकून दिला.
पोलिसांनी घटनास्थळाचा पंचनामा करून गॅस कटर जप्त केला असून परिसरातील सीसीटीव्ही फुटेजची तपासणी सुरू केली आहे. प्राथमिक अंदाजानुसार या गुन्ह्यात तीन ते चार चोरट्यांचा सहभाग असावा, असा संशय व्यक्त करण्यात येत आहे. पोलिसांनी अज्ञात आरोपींविरुद्ध गुन्हा दाखल करण्याची प्रक्रिया सुरू केली असून त्यांचा शोध घेण्यासाठी विशेष पथके कामाला लागली आहेत. बँकेच्या अत्याधुनिक सुरक्षा यंत्रणेमुळे आणि पोलिसांच्या तत्पर कारवाईमुळे लाखो रुपयांची रोकड चोरी होण्यापासून वाचल्याची चर्चा परिसरात सुरू आहे.
