जळगाव मिरर | ४ जुलै २०२६
शहरातील शिव कॉलनी परिसरातील गुंजन अपार्टमेंटच्या तळमजल्यावर असलेल्या ‘परिवर्तन इलेक्ट्रिक बाईक सर्व्हिसिंग सेंटर’ या दुकानाला शुक्रवारी (दि. ३ जुलै) दुपारच्या सुमारास अचानक भीषण आग लागल्याने परिसरात एकच खळबळ उडाली. इलेक्ट्रिक स्कूटरच्या लिथियम-आयन बॅटरीचे चार्जिंग सुरू असताना आग लागल्याचा प्राथमिक अंदाज व्यक्त करण्यात आला आहे. अग्निशमन दलाच्या तातडीच्या आणि शर्थीच्या प्रयत्नांमुळे अवघ्या २० मिनिटांत आग पूर्णपणे नियंत्रणात आली. त्यामुळे संभाव्य मोठी दुर्घटना टळली.
घटनेची माहिती मिळताच महापालिकेचे अग्निशमन दल घटनास्थळी दाखल झाले. दुकानातून मोठ्या प्रमाणात धूर आणि आगीच्या ज्वाळा बाहेर पडत असल्याने परिसरातील नागरिकांमध्ये भीतीचे वातावरण निर्माण झाले होते. आगीने काही क्षणांतच दुकानातील इलेक्ट्रिक स्कूटरच्या लिथियम-आयन बॅटऱ्या तसेच सर्व्हिसिंगसाठी लागणारे साहित्य आपल्या विळख्यात घेतले. दुकानाचे मालक निखिल संजय जाधव असून, संबंधित इमारतीच्या मालक संगीता पाटील आहेत. आगीत दुकानातील मोठ्या प्रमाणावर साहित्य जळून खाक झाले असून नेमक्या नुकसानीचा अंदाज अद्याप घेतला जात आहे.
आग तळमजल्यावरील दुकानात लागल्याने इमारतीच्या वरच्या मजल्यांवर राहणाऱ्या नागरिकांच्या सुरक्षेचा प्रश्न निर्माण झाला होता. विशेषतः घरांमध्ये असलेले एलपीजी गॅस सिलिंडर धोकादायक ठरू शकत असल्याने अग्निशमन दलाच्या जवानांनी प्रसंगावधान राखत ते तातडीने सुरक्षित स्थळी हलविले. या वेळी परिसरातील नागरिकांनाही सुरक्षित ठिकाणी हलविण्यात आले. त्यामुळे संभाव्य स्फोट किंवा जीवितहानीचा मोठा धोका टळला.
लिथियम-आयन बॅटरीमुळे आग अधिक भडकत असल्याने सुरुवातीला अग्निशमन दलाने पाण्याचा फवारा मारून तापमान कमी केले. त्यानंतर विशेष फोमचा वापर करून आगीवर पूर्णपणे नियंत्रण मिळविण्यात आले. दोन अग्निशमन बंबांच्या सहाय्याने सुमारे २० मिनिटांच्या अथक प्रयत्नांनंतर आग पूर्णपणे विझविण्यात यश आले.
मुख्य अग्निशमन अधिकारी अश्वजीत घरडे आणि उपअग्निशमन अधिकारी भारत बारी यांच्या मार्गदर्शनाखाली वाहनचालक देविदास सुरवाडे, प्रभाकर पाटील, गोविंद सोनवणे तसेच फायरमन रोहिदास चौधरी, तेजस जोशी, रजनीश भावसार, सत्तार तडवी, सुमित साबळे, यश मनोरे, नवल शंकरपाळ, ललित पाटील, दीपक रांधडे, रितेश उबाळे, वृषभ सुरवाडे आणि रवींद्र सपकाळे यांनी धाडसीपणे आग विझविण्याचे काम केले.
घटनेनंतर परिसरात काही काळ नागरिकांची मोठी गर्दी झाली होती. सुदैवाने या आगीत कोणतीही जीवितहानी झाली नाही. मात्र, दुकानातील साहित्याचे मोठे आर्थिक नुकसान झाले आहे. आगीचे नेमके कारण आणि नुकसानाचा तपशील संबंधित यंत्रणांकडून तपासला जात असून, प्राथमिक माहितीनुसार इलेक्ट्रिक स्कूटरच्या लिथियम-आयन बॅटरीचे चार्जिंग सुरू असताना आग लागल्याचा अंदाज व्यक्त करण्यात आला आहे.
