जळगाव मिरर | ४ जुलै २०२६
महाराष्ट्रातील राजकीय घडामोडींना पुन्हा वेग आला असून, शिवसेना (ठाकरे गट) सोडून नेत्यांचे दुसऱ्या गटात जाण्याच्या चर्चांनी राजकीय वातावरण तापले आहे. काही दिवसांपूर्वी ठाकरे गटातील सहा खासदारांनी उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केल्यानंतर आता खान्देशातील ठाकरे गटाच्या उपनेत्या शुभांगी पाटील या देखील शिंदे गटात प्रवेश करणार असल्याची जोरदार चर्चा राजकीय वर्तुळात सुरू झाली आहे.
मिळालेल्या माहितीनुसार, शुभांगी पाटील या आपल्या हजारो कार्यकर्ते व पदाधिकाऱ्यांसह धुळ्याहून मुंबईकडे रवाना झाल्या आहेत. मुख्यमंत्री एकनाथ शिंदे यांच्या उपस्थितीत त्यांचा अधिकृत पक्षप्रवेश होण्याची शक्यता वर्तविण्यात येत आहे. मात्र, या वृत्ताला संबंधित पक्षाकडून अधिकृत दुजोरा मिळालेला नाही. पक्षप्रवेशाच्या चर्चांवर भाष्य करताना शुभांगी पाटील यांनी, उद्धव ठाकरे यांच्याबाबत कोणतीही वैयक्तिक नाराजी नसल्याचे स्पष्ट केले आहे. “हजारो कार्यकर्ते आणि पदाधिकाऱ्यांच्या आग्रहामुळे हा निर्णय घेतला आहे,” अशी भूमिका त्यांनी मांडल्याचे सांगितले जात आहे. ठाकरे गटातील खासदारांच्या निर्गमनानंतर पुन्हा एकदा राजकीय वर्तुळात तथाकथित ‘ऑपरेशन टायगर’ चर्चेत आले आहे. ठाकरे गटातील आणखी काही पदाधिकारी आणि नेते शिंदे गटात प्रवेश करू शकतात, अशा चर्चांमुळे राजकीय घडामोडींना वेग आला आहे. तथापि, याबाबत कोणतीही अधिकृत घोषणा झालेली नाही.
काही दिवसांपूर्वी विकासनिधी मिळत नसल्याचा मुद्दा पुढे करत ठाकरे गटातील सहा खासदारांनी शिंदे गटात प्रवेश केल्याची राजकीय चर्चा रंगली होती. त्यानंतर आता शुभांगी पाटील यांच्या संभाव्य पक्षप्रवेशाच्या वृत्तामुळे ठाकरे गटाला आणखी एक धक्का बसणार का, याकडे राज्याच्या राजकीय वर्तुळाचे लक्ष लागले आहे. दरम्यान, शुभांगी पाटील यांच्या पक्षप्रवेशाबाबत अधिकृत घोषणा झाल्यानंतरच या राजकीय घडामोडींचे स्पष्ट चित्र समोर येणार आहे. त्यामुळे राज्यातील राजकारणात पुढील काही दिवस महत्त्वाचे ठरण्याची शक्यता व्यक्त केली जात आहे.
