जळगाव मिरर | १२ जुलै २०२६
शाहू नगरातील एमडी ड्रग्ज प्रकरणातील पेडलर शेख अबरार शेख मुक्तार उर्फ अबरार जिलानी हा गेल्या आठ महिन्यांपासून कारागृहात असून त्याचा चालक व अन्य पेडलर हे फरार होते. उपविभागीय पोलीस अधिकारी नितीन गणापुरे यांच्या पथकाने अबराचा चालक अरबाज खान मेहमूद खान उर्फ गबा (रा. मास्टर कॉलनी) व राजस्थानमधील पेडलर मुन्ना खान शेख जमाल खान उर्फ मामू (रा. मंडीया, राजस्थान, ह. मु. पिपलिया, जि. रतलाम, मध्यप्रदेश) या दोघांना अटक केली असून ते न्यायालयीन कोठडीत आहेत.
मिळालेल्या माहितीनुसार, शाहू नगरात पकडलेल्या साडेपाच लाख रुपयांचे एमडी ड्रग्ज प्रकरणात दहा महिने पोलिसांना गुंगारा देणाऱ्या शेख अबरार शेख मुक्तार उर्फ अबरार जिलानी याला मालेगाव किल्ला पोलीसांनी सहा लाख रुपयांचे ड्रग्ज विकतांना रंगेहाथ पकडले होते. या गुन्ह्यात त्याच्यासोबत असलेले साथीदार अरबाज खान मेहमुद खान उर्फ गबा रा. मास्टर कॉलनी हा फरार होता. पोलीस चौकशीत अबरार जिलानी याने हे ड्रग्ज त्याचा चालक अरबाज खान मेहमुद खान याच्या मदतीने राजस्थान येथील पेडलर मुन्ना खान शेख जमाल खान उर्फ मामू याच्याकडून खरेदी केल्याचे पोलिसांना सांगितले होते. त्यानुसार दोघांचा कसून शोध सुरु होता. दरम्यान, त्या दोघांना मालेगाव किल्ला पोलीसांनी अटक केली होती.
मालेगाव पोलिसांनी दोघांना अटक केल्यानंतर उपविभागीय पोलीस अधिकारी नितीन गणापुरे यांच्या मार्गदर्शनाखाली शहर पोलीस ठाण्यातील गुन्ह्यात फरार असलेले अरबाज खान मेहमुद खान व मुन्ना खान शेख जमाल खान उर्फ मामू या दोघांना ताब्यात घेतले. त्यांची कसून चौकशी केल्यानंतर न्यायालयाने त्या दोघांची कारागृहात न्यायालयीन कोठडीत रवानगी करण्यात आली आहे.
