जळगाव मिरर | १५ जुलै २०२६
सोन्याचे दागिने घेऊन मोड म्हणून सोन्याची पॉलिश असलेली चांदी देऊन दिलीप खेतमल लुनिया (वय ५५, रा. गणपतीनगर) यांची ६ लाखांची फसवणूक केल्याची घटना घडली होती. याप्रकरणी शहर पोलिसांच्या गुन्हे शोध पथकाने तांत्रिक विश्लेषणाच्या आधारावर संशयित दीपक अशोक कुमार (वय ३२, रा. जोधपूर, राजस्थान) याच्या मुसक्या आवळल्या असून त्याचा साथीदार मात्र अद्याप फरार आहे.
मिळालेल्या माहितीनुसार, शहरातील सराफ व्यावसायिक दिलीप लुनिया यांना दि. २३ जून रोजी त्यांना बऱ्हाणपूर येथील महेश वर्मा नावाच्या व्यक्तीचा कॉल आला व सोन्याचे दागिने घ्यायचे असल्याचे सांगितले. दागिन्यांचे फोटो मागविल्यानंतर त्यातील २ चेनच्या डिझाईन त्याला पसंत पडल्या. संशयितांने पैशांऐवजी त्याच्याकडे असलेले ४९.३५० ग्रॅम सोन्याचे तुकडे देण्याचे सांगितले. त्यानुसार त्याचा राजेश नावाचा शालक जळगावात घाणेकर चौकात आला. लुनिया यांनी त्याला। ४२.५५० ग्रॅम वजनाचे दागिने दिले व समोरील व्यक्तीने त्याला मोड म्हणून तुकडे दिले होते. दुकानावर गेल्यावर लुनिया यांनी तुकड्याचे वजन मोजले असता ते कमी भरले व त्यातही चांदीवर सोन्याचे पॉलिश केल्याचे आढळल्यानंतर त्यांनी शहर पोलिसात तक्रार दिली. त्यानुसार दोघ संशयितांविरुद्ध फसवणुकीचा गुन्हा दाखल करण्यात आला होता.
भरदिवसा वर्दळीच्या ठिकाणी फसवणुक झाल्याची घटना घडल्यानंतर शहर पोलिस ठाण्याचे पोलीस निरीक्षक सागर शिंपी यांनी घटनेचे गांभीर्य लक्षात घेत गुन्हे शोध पथकाला तपासाचा सूचना दिल्या. त्यानुसार गुन्हे शोध पथकातील पोहेकॉ सतिष पाटील, प्रशांत जाधव, अमोल ठाकूर, प्रणय पवार यांचे पथक रवाना केले. या पथकाने तांत्रिक विश्लेषणाच्या आधारावर राजस्थान येथून संशयित दीपक अशोक कुमार याच्या मुसक्या अवळल्या. तर त्याचा साथीदाराचा कसून शोध घेतला जात आहे
