जळगाव मिरर | १५ जुलै २०२६
अमरावती शहरातील राजेंद्र नगर परिसरात प्रेमप्रकरणाच्या वादातून २४ वर्षीय तरुणाची भररस्त्यात कोयत्याने सपासप वार करून निर्घृण हत्या करण्यात आल्याची धक्कादायक घटना घडली आहे. या हल्ल्यात तरुणाच्या हाताचा पंजा मनगटापासून वेगळा झाला असून, संपूर्ण थरार सीसीटीव्ही कॅमेऱ्यात कैद झाला आहे. या घटनेमुळे अमरावती शहरात भीतीचे वातावरण निर्माण झाले आहे.
मृत तरुणाची ओळख शेख अफाक शेख अकिल (वय २४, रा. ताज नगर, अमरावती) अशी झाली आहे. प्राथमिक तपासानुसार, एका तरुणीवरून सुरू असलेल्या प्रेमप्रकरणाच्या वादातून ही हत्या झाल्याचे समोर आले आहे. दोन्ही गटांमध्ये काही दिवसांपासून तणाव होता. हा वाद मिटवण्यासाठी आणि सामोपचाराने तोडगा काढण्यासाठी दोन्ही बाजूंना राजेंद्र नगर परिसरात बोलावण्यात आले होते. मात्र, चर्चा सुरू असतानाच वाद विकोपाला गेला.
यावेळी आरोपींनी अचानक धारदार कोयते काढून अफाकवर जीवघेणा हल्ला चढवला. सुरुवातीच्या वारांमध्येच त्याच्या हाताचा पंजा मनगटापासून तुटून खाली पडला. गंभीर जखमी झाल्यानंतरही अफाकने जीव वाचवण्यासाठी पळण्याचा प्रयत्न केला. मात्र, हल्लेखोरांनी त्याचा पाठलाग करत भररस्त्यात पुन्हा कोयत्याने सपासप वार केले. अतिरक्तस्रावामुळे अफाकचा घटनास्थळीच मृत्यू झाला.
या भीषण घटनेची माहिती मिळताच अमरावती पोलिसांनी तातडीने घटनास्थळी धाव घेत तपास सुरू केला. परिसरातील सीसीटीव्ही फुटेज पोलिसांच्या हाती लागले असून, त्यामध्ये हल्ल्याचा संपूर्ण प्रकार स्पष्टपणे कैद झाला आहे. या डिजिटल पुराव्याच्या आधारे पोलिसांनी आरोपींची ओळख पटविण्यास सुरुवात केली.
पोलीस उपायुक्त यशवंत सोळंके यांनी दिलेल्या माहितीनुसार, या प्रकरणात एकूण चार आरोपींचा सहभाग निष्पन्न झाला असून, त्यापैकी तीन आरोपी अल्पवयीन आहेत. सर्व आरोपींचा शोध घेण्यासाठी विशेष पथके रवाना करण्यात आली असून, त्यांना लवकरच अटक करण्यात येईल, असा विश्वास पोलिसांनी व्यक्त केला आहे.
भरदिवसा आणि सार्वजनिक रस्त्यावर घडलेल्या या क्रूर हत्याकांडामुळे अमरावती शहरात भीतीचे वातावरण पसरले असून, नागरिकांनी कायदा-सुव्यवस्थेबाबत चिंता व्यक्त केली आहे. एमआयडीसी पोलीस ठाण्यात गुन्हा दाखल करण्यात आला असून, पोलिसांकडून घटनेचा सर्व बाजूंनी सखोल तपास सुरू आहे. प्रेमप्रकरणातून सुरू झालेला वाद इतक्या भीषण हत्येत परिवर्तित झाल्याने शहरात मोठी खळबळ उडाली आहे.
