जळगाव मिरर | २२ जुलै २०२६
तरसोद फाट्यावरील एचडीएफसी बँक शाखेत मध्यरात्री दोन अज्ञात चोरट्यांनी मागील भिंत फोडून प्रवेश करत तिजोरी फोडून चोरी करण्याचा प्रयत्न केला. मात्र, बँकेचा सुरक्षा सायरन वाजताच चोरट्यांनी घटनास्थळावरून पळ काढला. दिल्ली येथील कमांड सेंटरची सतर्कता आणि नशिराबाद पोलिसांचा तातडीचा प्रतिसाद यामुळे लाखो रुपयांची संभाव्य चोरी टळली. ही घटना २० जुलैच्या मध्यरात्री घडली असून, याप्रकरणी दोन अज्ञात चोरट्यांविरुद्ध नशिराबाद पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, २० जुलै रोजी रात्री १२:५९ वाजेच्या सुमारास दोन अज्ञात इसमांनी बँकेच्या मागील बाजूची भिंत फोडून आत प्रवेश केला. त्यानंतर त्यांनी तिजोरीपर्यंत पोहोचून ती फोडण्याचा प्रयत्न सुरू केला. याचवेळी बँकेची अत्याधुनिक सुरक्षा यंत्रणा सक्रिय झाली आणि सायरन जोरात वाजू लागला. त्यामुळे पकडले जाण्याच्या भीतीने चोरट्यांनी चोरीचा प्रयत्न अर्धवट सोडून घटनास्थळावरून पळ काढला.
ही संपूर्ण घटना बँकेतील सीसीटीव्ही कॅमेऱ्यांमध्ये कैद झाली. फुटेज दिल्ली येथील कमांड सेंटरमध्ये दिसताच तेथील अधिकाऱ्यांनी तत्काळ बँकेचे व्यवस्थापक वाजीद अली सैय्यद (वय ४५) यांच्याशी संपर्क साधून घटनेची माहिती दिली. त्यानंतर सैय्यद यांनी त्वरित नशिराबाद पोलिस ठाण्याशी संपर्क साधला.
घटनेची माहिती मिळताच नशिराबाद पोलिसांचे पथक तातडीने घटनास्थळी दाखल झाले. बँकेचे व्यवस्थापक वाजीद अली सैय्यद तसेच विभागप्रमुख आकाश जैन यांनीही बँकेत धाव घेतली. पोलिसांनी घटनास्थळाची पाहणी करून पंचनामा केला. प्राथमिक तपासात चोरट्यांनी तिजोरी उघडण्यात अपयश आल्याने कोणतीही रोकड चोरीस गेली नसल्याचे स्पष्ट झाले. या घटनेत दिल्ली कमांड सेंटरची सतर्कता, बँकेची सुरक्षा यंत्रणा आणि पोलिसांचा तात्काळ प्रतिसाद यामुळे मोठा आर्थिक अनर्थ टळल्याची चर्चा परिसरात होत आहे.
याप्रकरणी बँक व्यवस्थापक वाजीद अली सैय्यद यांच्या फिर्यादीवरून २१ जुलै रोजी नशिराबाद पोलिस ठाण्यात दोन अज्ञात चोरट्यांविरुद्ध गुन्हा दाखल करण्यात आला आहे. सहायक पोलिस निरीक्षक योगिता नारखेडे या प्रकरणाचा तपास करीत असून, परिसरातील तसेच महामार्गावरील सीसीटीव्ही फुटेजची तपासणी करून संशयितांचा माग काढण्याचे काम सुरू आहे.
