जळगाव मिरर | २७ जुलै २०२६
भुसावळ तालुक्यातील वरणगाव शहरातील डॉ. बाबासाहेब आंबेडकरनगर येथे राहणाऱ्या दीपनगर : वरणगाव औष्णिक विद्युत केंद्रातील कंत्राटी कर्मचाऱ्याने राहत्या घरी गळफास घेऊन आत्महत्या केल्याची घटना रविवारी दि. २६ सकाळी उघडकीस आली. मिलिंद रमेश इंगळे (वय ५२, रा. आंबेडकर नगर, वरणगाव) असे मृताचे नाव आहे.
मिळालेल्या माहितीनुसार, मिलिंद इंगळे हे दीपनगर औष्णिक विद्युत केंद्रात कंत्राटदारामार्फत कार्यरत होते. पत्नी सुवर्णा, दोन मुलींसह ते आंबेडकरनगर येथे राहत होते. अनेक वर्षांपासून त्यांना दारूचे व्यसन होते. या व्यसनामुळे ते मानसिक तणावात असल्याची माहिती त्यांच्या पत्नीने पोलिसांना दिलेल्या जबाबात नमूद केली आहे. सुवर्णा इंगळे या रविवारी सकाळी सुमारे ६ वाजता स्वयंपाकासाठी उठल्यानंतर घराच्या मागील बाजूस असलेल्या बेडरूममध्ये गेल्या असता, पती मिलिंद इंगळे यांनी छताच्या पंख्याला पांढऱ्या रंगाच्या साडीच्या सहाय्याने गळफास घेतल्याचे त्यांच्या निदर्शनास आले.
हा प्रकार पाहताच त्यांनी आरडाओरड केली. त्यानंतर परिसरातील नागरिक घटनास्थळी धावले. वरणगाव ग्रामीण रुग्णालयात नेण्यात आले. मात्र, तेथे वैद्यकीय अधिकाऱ्यांनी तपासणीअंती त्यांना मृत घोषित केले. सुवर्णा इंगळे यांनी दिलेल्या खबरीवरून वरणगाव पोलीसात आकस्मिक मृत्यूची नोंद करण्यात आली असून, पुढील तपास पोलीस करत आहेत. मृताच्या पश्चात पत्नी आणि दोन मुली असा परिवार आहे.
