जळगाव मिरर/ ३० जुलै २०२६
भाजपाचे उत्तर महाराष्ट्र संयोजक विजय चौधरी आणि राज्याचे मंत्री गिरीश महाजन यांच्यातील असल्याचा दावा करण्यात येणारी एक कथित ऑडिओ क्लिप सोशल मीडियावर मोठ्या प्रमाणात व्हायरल झाली असून, त्यामुळे राज्याच्या राजकारणात एकच खळबळ उडाली आहे. या कथित संभाषणात ज्येष्ठ नेते एकनाथ खडसे आणि केंद्रीय राज्यमंत्री रक्षा खडसे यांच्याबाबत आक्षेपार्ह भाषेचा वापर झाल्याचा दावा केला जात आहे. मात्र, या ऑडिओ क्लिपच्या सत्यतेला अद्याप कोणत्याही संबंधित व्यक्ती किंवा भाजपकडून अधिकृत दुजोरा मिळालेला नाही.
व्हायरल होत असलेल्या कथित क्लिपमध्ये विजय चौधरी हे एकनाथ खडसे आणि त्यांच्या कुटुंबाकडून भाजपवर सातत्याने टीका होत असल्याचा उल्लेख करताना दिसत आहेत. त्याचवेळी केंद्रीय राज्यमंत्री रक्षा खडसे या मंत्रिमंडळात कायम का आहेत, असा प्रश्नही कथित संभाषणात उपस्थित करण्यात आला आहे. “एकाच घरातील सदस्य भाजपवर टीका करतात आणि दुसरीकडे मंत्रिपद कायम आहे, ही दुहेरी भूमिका थांबली पाहिजे,” अशा आशयाचे वक्तव्य कथित क्लिपमध्ये ऐकू येत असल्याचा दावा सोशल मीडियावर केला जात आहे.
याच कथित संभाषणादरम्यान मंत्री गिरीश महाजन “हम्म… हम्म…” तसेच “बरोबर आहे,” असे प्रतिसाद देताना ऐकू येत असल्याचा दावा केला जात आहे. पुढे विजय चौधरी यांनी पक्षाने याबाबत आक्रमक भूमिका घेत रक्षा खडसे यांच्या राजीनाम्याचा विचार करावा, अशी कथित मागणी केल्याचेही क्लिपमध्ये असल्याचे सांगितले जात आहे.
ही कथित ऑडिओ क्लिप व्हायरल झाल्यानंतर भाजपातील अंतर्गत मतभेद पुन्हा एकदा चर्चेच्या केंद्रस्थानी आले आहेत. विशेषतः गिरीश महाजन आणि एकनाथ खडसे यांच्यातील राजकीय संघर्ष अद्याप कायम असल्याच्या चर्चांना या घटनेमुळे पुन्हा उधाण आले आहे. सोशल मीडियावर या क्लिपबाबत विविध प्रतिक्रिया उमटत असून, राजकीय वर्तुळातही तर्कवितर्कांना वेग आला आहे.
दरम्यान, या कथित ऑडिओ क्लिपबाबत संबंधित नेते किंवा भाजपच्या अधिकृत पातळीवर कोणतीही प्रतिक्रिया अथवा स्पष्टीकरण देण्यात आलेले नाही. त्यामुळे क्लिपमधील संभाषणाची सत्यता स्वतंत्रपणे पडताळून झालेली नसून, या प्रकरणाकडे सर्वांचे लक्ष लागले आहे. संबंधित पक्षांकडून अधिकृत भूमिका स्पष्ट झाल्यानंतरच या प्रकरणाचे वास्तव समोर येणार आहे.
