जळगाव मिरर/२४ ऑगस्ट २०२६
शहरातील ममुराबाद रस्त्यावर प्रजापती नगराजवळ सोमवारी कावड यात्रेदरम्यान भीषण अपघात झाला. देवीच्या मंदिरातून दर्शन घेऊन बाहेर पडणाऱ्या दहा वर्षीय चिमुकल्याला भरधाव ट्रकने धडक दिल्याने त्याचा घटनास्थळीच मृत्यू झाला. या घटनेनंतर संतप्त जमावाने ट्रक पेटवून दिला तसेच चालकाला मारहाण केली. जमावाने रास्ता रोको केल्याने काही काळ दोन्ही बाजूंची वाहतूक ठप्प झाली होती.
मिळालेल्या माहितीनुसार मयत मुलाचे नाव प्रबल राजू गवळी असून तो दहा वर्षांचा होता. तो गवळीवाडा, शनिपेठ येथे राहत होता. कावड यात्रेच्या पार्श्वभूमीवर ममुराबाद रस्त्यावर भाविकांची मोठी वर्दळ होती. याचदरम्यान प्रजापती नगराजवळील देवीच्या मंदिरातून दर्शन घेऊन बाहेर पडताना प्रबलला ट्रकने धडक दिली. धडक एवढी भीषण होती की त्याचा जागीच मृत्यू झाला.
अपघातानंतर संतप्त नागरिकांनी घटनास्थळी गर्दी करत रास्ता रोको केला. जमावाने ट्रकचालकाला त्यांच्या ताब्यात देण्याची मागणी केली. संतप्त जमावाने ट्रक पेटवून दिला. घटनेचे मोबाईलवर चित्रीकरण करणाऱ्या काही व्यक्तींनाही जमावाने मारहाण केल्याची माहिती आहे. त्यामुळे परिसरात काही काळ तणावाचे वातावरण निर्माण झाले.
अपघातातील ट्रकचालकाचे नाव उबेद खान इकबाल खान पठाण असून त्याचे वय 34 वर्षे आहे. तो चोपडा येथील रहिवासी आहे. संबंधित ट्रक जळगाव ते चोपडा या मार्गावर किराणा माल व रेशन वाहतूक करीत होता.
घटनेनंतर पोलिसांनी घटनास्थळी बंदोबस्त तैनात करून जमावाला पांगविण्याचा प्रयत्न केला. मारहाण झाल्यामुळे ट्रकचालकाला रुग्णालयात दाखल करण्यात आले असून त्याच्या सुरक्षेसाठी पोलिस बंदोबस्त ठेवण्यात आला आहे. मयत मुलाचा मृतदेह सिव्हिल रुग्णालयात हलविण्यात आला असून गुन्हा दाखल करण्याची प्रक्रिया सुरू आहे. ट्रकला लागलेली आग विझविण्यात आली.
