जळगाव मिरर | २८ ऑगस्ट २०२६
शहरातील रामेश्वर कॉलनी परिसरातील विश्वकर्मा नगरात अज्ञात चोरट्याने घराचे कुलूप तोडून धाडसी घरफोडी केल्याची घटना समोर आली आहे. या चोरीत घरातील सुमारे ४५ ते ४६ तोळे सोने आणि १ लाख ५० हजार रुपयांची रोकड चोरीला गेल्याची प्राथमिक माहिती पोलिसांकडून मिळाली आहे. भरवस्तीत झालेल्या या घरफोडीमुळे परिसरात एकच खळबळ उडाली असून नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, घरमालक उज्जैन येथील महाकाल दर्शनासाठी बाहेरगावी गेले होते. घर बंद असल्याची संधी साधून अज्ञात चोरट्याने रात्री सुमारे १.३० ते २ वाजेच्या दरम्यान घराचे कुलूप तोडले. त्यानंतर घरात प्रवेश करून बेडरूममधील कपाट फोडण्यात आले. कपाटातील सोने आणि रोकड चोरून चोरटा पसार झाल्याचे प्राथमिक तपासात समोर आले आहे. घटनेची माहिती मिळताच पोलिसांनी तातडीने घटनास्थळी धाव घेतली. घराची पाहणी करून पंचनामा करण्याची प्रक्रिया सुरू करण्यात आली. तसेच ठसे तज्ज्ञांना पाचारण करण्यात आले असून, घटनास्थळावरून महत्त्वाचे पुरावे गोळा करण्यात आले आहेत.
दरम्यान, चोरट्याचा माग काढण्यासाठी श्वान पथकालाही पाचारण करण्यात आले. मात्र, श्वान घराच्या मागील तसेच पुढील परिसरातच घुटमळत राहिल्याने चोरट्याचा ठोस माग काढण्यात यश आले नाही. पोलिसांनी आता घरातील तसेच परिसरातील सीसीटीव्ही कॅमेऱ्यांचे फुटेज तपासण्यास सुरुवात केली आहे. या फुटेजमध्ये एक संशयित चोरटा कैद झाल्याची माहिती समोर आली असून, त्याच्या हालचालींच्या आधारे पोलिसांकडून तपास सुरू आहे. सीसीटीव्ही फुटेज, घटनास्थळावरील ठसे आणि इतर तांत्रिक पुराव्यांच्या आधारे चोरट्यापर्यंत पोहोचण्याचे प्रयत्न सुरू आहेत.
दरम्यान, चोरीला गेलेल्या सोन्याचे नेमके वजन आणि रोकड किती होती, याबाबत अधिकृत आकडा गुन्हा दाखल झाल्यानंतरच स्पष्ट होणार आहे. सध्या सुमारे ४५ ते ४६ तोळे सोने आणि दीड लाख रुपये रोकड चोरीला गेल्याची प्राथमिक माहिती आहे. गुन्हा दाखल करण्याची प्रक्रिया सुरू असून, पोलिस तपासातून या घरफोडीतील अधिकृत माहिती समोर येणार आहे. भरवस्तीत रात्रीच्या सुमारास झालेल्या या धाडसी घरफोडीमुळे परिसरातील सुरक्षा व्यवस्थेचा प्रश्न पुन्हा ऐरणीवर आला आहे. अज्ञात चोरट्याचा लवकरात लवकर शोध घेऊन कारवाई करण्याचे आव्हान पोलिसांसमोर आहे.
